റാന്നി: ലോകകപ്പ് ഫുട്ബോളിന്റെ പശ്ചാത്തലത്തിൽ യുവാക്കളിലും വിദ്യാർത്ഥികളിലും വർദ്ധിച്ചുവരുന്ന ലഹരി ഉപയോഗത്തിനെതിരെ ബോധവൽക്കരണവുമായി റാന്നി ഗ്രാമപഞ്ചായത്തും എം.എസ്.ഹയർ സെക്കൻഡറി സ്കൂളും കൈകോർത്തു. ഇതിന്റെ ഭാഗമായി ‘ഫുട്ബോളാണ് ലഹരി’ എന്ന സന്ദേശം മുൻനിർത്തി ഇരുവിഭാഗവും സംയുക്തമായി ലഹരിവിരുദ്ധ റാലിയും പെനാൽറ്റി ഷൂട്ട് ഔട്ട് സൗഹൃദ മത്സരവും സംഘടിപ്പിച്ചു. റാന്നി പെരുമ്പുഴ ബസ് സ്റ്റാൻഡിൽ നടന്ന ലഹരിവിരുദ്ധ പരിപാടിയിൽ പഴകുളം മധു എം.എൽ.എ മുഖ്യപ്രഭാഷണം നടത്തി. ഗ്രാമപഞ്ചായത്ത് വൈസ് പ്രസിഡന്റ് ടി.ജെ. ബാബുരാജ് അധ്യക്ഷത വഹിച്ചു. റാന്നി ഗ്രാമപഞ്ചായത്ത് പ്രസിഡന്റ് ശശികല രാജശേഖരൻ ലഹരിവിരുദ്ധ റാലി ഫ്ലാഗ് ഓഫ് ചെയ്തു. കട്ടപ്പന ഗവ.ആശുപത്രി ഫിസിഷൻ ഡോ.അജാസ് ലഹരിവിരുദ്ധ സന്ദേശം നൽകി.
റാന്നി ഗ്രാമപഞ്ചായത്ത് മെമ്പർമാർ, എക്സൈസ് ഉദ്യോഗസ്ഥർ, ഹരിതകർമ്മ സേന, കുടുംബശ്രീ പ്രവർത്തകരും എം.എസ്. സ്കൂളിലെ എസ്.പി.സി, എൻ.എസ്.എസ്, ലിറ്റിൽ കൈറ്റ്സ്, സ്കൗട്ട് ആൻഡ് ഗൈഡ്സ് എന്നീ വിഭാഗങ്ങളിലെ വിദ്യാർത്ഥികളും അധ്യാപകരും റാലിയിൽ അണിനിരന്നു. ലഹരിവിരുദ്ധ പ്ലക്കാർഡുകളും മുദ്രാവാക്യങ്ങളുമായി നൂറുകണക്കിന് ആളുകളാണ് റാലിയുടെ ഭാഗമായത്. റാലിക്കുശേഷം എം.എസ്.സ്കൂൾ ഗ്രൗണ്ടിൽ പെനാൽറ്റി ഷൂട്ട് ഔട്ട് സൗഹൃദ മത്സരവും നടന്നു. മത്സരത്തിന്റെ ഉദ്ഘാടനം സ്കൂൾ മാനേജർ കെ.സി.ജേക്കബ് നിർവഹിച്ചു. സ്കൂൾ പ്രിൻസിപ്പൽ സ്മിജു ജേക്കബ്, ഹെഡ്മിസ്ട്രസ് സിംലമോൾ ഏബ്രഹാം, ഗ്രാമ പഞ്ചായത്ത് സെക്രട്ടറി ജി.സുധാകുമാരി, അസിസ്റ്റന്റ് സെക്രട്ടറി എ.പി.രമേശ് കുമാർ എന്നിവര് പങ്കെടുത്തു.
