പത്തനംതിട്ട : വന്തുക ബാങ്ക് വായ്പ നല്കാമെന്ന് വാഗ്ദാനം നല്കി കേരളത്തിലുടനീളം ലക്ഷങ്ങള് തട്ടിയ നാലുപേര് ബെംഗളൂരുവില് അറസ്റ്റില്. പിടിയിലായവരില് പത്തനംതിട്ട സ്വദേശിയും. താനൂര് ഡിവൈഎസ്പി യുടെ നേതൃത്വത്തിലാണ് പ്രതികളെ പിടികൂടിയത്. തെങ്കാശി സ്വദേശി വീരകുമാര്, കോട്ടയം സ്വദേശി സരുണ്, മലപ്പുറം പാണ്ടിക്കാട് സ്വദേശി ജിബിന്, പത്തനംതിട്ട സ്വദേശി രാഹുല് എന്നിവരാണ് പിടിയിലായത്.
ബത്തലഹേം അസോസിയേറ്റ്സ് എന്ന വ്യാജ മേല്വിലാസത്തിലാണ് പ്രതികള് തട്ടിപ്പ് നടത്തിയിരുന്നത്. ബാങ്ക് വായ്പ നല്കാമെന്ന് ഫോണില് സന്ദേശം അയച്ച് ഇടപാടുകാരെ കണ്ടെത്തിയ ശേഷമാണ് പണം കൈക്കലാക്കിയിരുന്നത്.
പ്രോസസിങ് ഫീസ്, മുദ്രപത്രം, സര്വ്വീസ് ചാര്ജ് ഇനങ്ങളില് ഒന്നര ലക്ഷം രൂപയോളം പ്രതികള് മുന്കൂറായി കൈക്കലാക്കും. തുടര്ന്ന് നമ്പര് ബ്ലോക്ക് ചെയ്ത് മുങ്ങുകയാണ് പതിവ്. തട്ടിപ്പ് നടത്തി കിട്ടുന്ന പണം ഉപയോഗിച്ച് ആഢംബരജീവിതം നയിച്ചിരുന്ന പ്രതികളില് നിന്ന് 16 എ.ടി.എം കാര്ഡുകള്, 15 മൊബൈല് ഫോണുകള്, വിവിധ ബാങ്കുകളുടെ പാസ് ബുക്കുകള് എന്നിവയും കണ്ടെടുത്തു. വ്യാജരേഖകള് സമര്പ്പിച്ചാണ് പ്രതികള് ബാങ്ക് അക്കൗണ്ട് തുടങ്ങിയിരുന്നത്.
