ഏറണാകുളം; 75 ലക്ഷം ലോട്ടറി അടിച്ച അന്യസംസ്ഥാന തൊഴിലാളി പോലീസ് സ്റ്റേഷനിലേക്ക് ഓടിയെത്തി. സ്ത്രീശക്തി ലോട്ടറിയുടെ 75 ലക്ഷം രൂപ ഒന്നാം സമ്മാനം അടിച്ച ഞെട്ടലിലാണ് അന്യസംസ്ഥാന തൊഴിലാളി പോലീസ് സ്റ്റേഷനിലേക്ക് ഓടിയെത്തിയത്. ചോറ്റാനിക്കരയിലെത്തിയ കൊല്ക്കത്ത സ്വദേശിയായ എസ്.കെ.ബദേസാണ് ലോട്ടറി അടിച്ച പരിഭ്രാന്തിയില് പോലീസിന്റെ സഹായം തേടിയെത്തിയത്. തന്റെ കയ്യില് നിന്നും ആരെങ്കിലും ലോട്ടറി തട്ടിയെടുക്കുമോ എന്ന ആശങ്കയിലായിരുന്ന ബദേസിനെ പോലീസ് ഉദ്യോഗസ്ഥര് ആശ്വസിപ്പിക്കുകയും കൃത്യമായ മാര്ഗ്ഗ നിര്ദ്ദേശങ്ങളും ഉപദേശങ്ങളും നല്കുകയും ചെയ്തു.
കേരളാ പൊലീസിന്റെ ഔദ്യോഗിക ഫെയ്സ്ബുക്ക് പേജില് ഈ സംഭവം വിവരിച്ചുകൊണ്ട് പോസ്റ്റ് ഇട്ടതോടുകൂടിയാണ് സംഭവം പുറത്തറിഞ്ഞത്. ഞെട്ടലില് അന്യസംസ്ഥാന തൊഴിലാളി ഓടിയെത്തിയത് മൂവാറ്റുപുഴ പോലീസ് സ്റ്റേഷനിലേക്കാണ്. ഒന്നാം സമ്മാനം അടിച്ച കാര്യം അറിഞ്ഞപ്പോള് എന്തു ചെയ്യണമെന്നറിയാതെ പകച്ചുപോയ ബദേസ് നേരെ പോലീസ് സ്റ്റേഷനിലെത്തി പോലീസുദ്യോഗസ്ഥരോട് കാര്യം പറയുകയായിരുന്നു. റോഡ് ടാറിങ് ജോലിക്കായി ചോറ്റാനിക്കരയിലെത്തിയപ്പോഴാണ് ഇയാള് ലോട്ടറി എടുത്തത്. ഭാഗ്യമായി ലഭിച്ച പണവുമായി കൊല്ക്കത്തയിലേക്ക് മടങ്ങാനായി കാത്തിരിക്കുകയാണ് ബദേസ്.
