കോന്നി : കുളത്തുമണ്ണില് ജനവാസ മേഖലയില് അവശനിലയില് കണ്ടെത്തിയ മ്ലാവിനെ വനപാലകര് കാട്ടിലേക്ക് കയറ്റി വിട്ടുവെന്ന് ആരോപണം. കഴിഞ്ഞ ദിവസം പകലാണ് പാടം ഫോറസ്റ്റ് സ്റ്റേഷന് പരിധിയിലെ കുളത്തുമണ് ജനവാസ മേഖലയില് മ്ലാവിനെ കണ്ടെത്തിയത്. റബ്ബര് ടാപ്പിംഗ് തൊഴിലാളികളാണ് മ്ലാവിനെ കണ്ടത്. ആളുകള് അടുത്ത് ചെന്നാല് പോലും മ്ലാവ് ഓടിപോകുന്ന നിലയില് ആയിരുന്നില്ല. മ്ലാവ് ഏറെ അവശ നിലയിലായിരുന്നു എന്നാണ് ടാപ്പിംഗ് തൊഴിലാളികള് പറയുന്നത്. കല്ലേലി താമരപ്പള്ളി റോഡിലേക്ക് ഇറങ്ങിയ മ്ലാവ് ഇവിടെ ഏറെ നേരം നിലയുറപ്പിക്കുകയും ചെയ്തു.
മ്ലാവിന് പരിക്ക് പറ്റിയിട്ടുണ്ടെന്ന നാട്ടുകാരുടെ സംശയത്തെ തുടര്ന്ന് ഇവര് വനപാലകരെ വിവരമറിയിക്കുകയും പാടം ഫോറസ്റ്റ് സ്റ്റേഷന് അധികൃതരും കോന്നി ആര്.ആര്.റ്റി സംഘവും സ്ഥലത്തെത്തി മ്ലാവിനെ പിടികൂടി പരിശോധന നടത്തുകയും ചെയ്തുവെന്ന് പറയുന്നു. മ്ലാവിന് പരിക്കേറ്റിട്ടില്ല എന്നാണ് വനപാലകരുടെ കണ്ടെത്തല്. പുലിയുടെയോ മറ്റോ ആക്രമണത്തില് ഭയന്നതാകാം മ്ലാവ് ജനവാസ മേഖലയില് നിന്നും വിട്ടുപോകാതെ നിന്നതിന് കാരണമെന്നാണ് വനപാലകര് പറയുന്നത്. സ്ഥലത്ത് നിന്നും മാറ്റിയ മ്ലാവിനെ ഉളിയനാട് വനമേഖലയില് വിട്ടയച്ചതായി വനപാലകര് അറിയിച്ചു.
