അള്ജിയേഴ്സ് : മുന് അള്ജീരിയന് പ്രസിഡന്റ് അബ്ദുല് അസീസ് ബൂതഫ്ലിക്ക (84) അന്തരിച്ചു. അള്ജീരിയന് അബ്ദുല് മാജിദ് തെബൂണിന്റെ ഓഫീസില് നിന്ന് വെള്ളിയാഴ്ച വൈകീട്ടാണ് മരണവാര്ത്ത സ്ഥിരീകരിച്ചത്. മരണകാരണമോ സംസ്കാരം സംബന്ധിച്ച വിവരങ്ങളോ ഓഫീസ് പുറത്തുവിട്ടിട്ടില്ല. അള്ജീരിയയിലെ ആദ്യത്തെ സിവിലിയന് നേതാവായ അബ്ദുല് അസീസ് 1999 ലാണ് അധികാരമേല്ക്കുന്നത്.
രാജ്യത്തിന്റെ സ്വാതന്ത്ര്യത്തിന് വേണ്ടി പോരാടിയ ബൂതഫ്ലിക്ക രണ്ട് ദശാബ്ദത്തോളം ഉത്തരാഫ്രിക്കന് രാഷ്ട്രമായ അള്ജീരിയയില് ഭരണം നടത്തി. ഇന്ഫ്രാസ്ട്രക്ചര്, ഹൈഡ്രോകാര്ബണ് പ്രോജക്ടുകളെക്കുറിച്ചുള്ള അഴിമതികള് അദ്ദേഹത്തെ വര്ഷങ്ങളോളം വേട്ടയാടി. അദ്ദേഹത്തിന്റെ സഹോദരനും രണ്ട് മുന് പ്രധാനമന്ത്രിമാരും മറ്റ് ഉന്നത ഉദ്യോഗസ്ഥരും ഇപ്പോള് അഴിമതിയുടെ പേരില് ജയിലിലാണ്.