കുന്ദമംഗലം: കാണാതായ സ്ത്രീയുടെ മൃതദേഹം പുഴയില് നിന്ന് കണ്ടെത്തി. മുറിയനാല് കരുവാരപ്പറ്റ റുഖിയ്യയുടെ (53) മൃതദേഹമാണ് കാരന്തൂര് ഭാഗത്തുള്ള തൈക്കണ്ടി കടവില് നിന്ന് ചൊവ്വാഴ്ച രാവിലെ ഐ.ആര്.ഡബ്ല്യു വളണ്ടിയര്മാര് കണ്ടെടുത്തത്. പന്തീര്പാടം പണ്ടാരപറമ്പ് പുഴയുടെ തീരത്തുള്ള കുന്നില് താമസക്കാരിയാണ്. കഴിഞ്ഞ 19ന് രാവിലെ മുതലാണ് ഇവരെ കാണാതായത്. കുന്ദമംഗലം പോലീസും ഫയര്ഫോഴ്സും നാട്ടുകാരും ചേര്ന്ന് പുഴയിലും പരിസരങ്ങളിലും തിരച്ചില് നടത്തിയെങ്കിലും കണ്ടെത്തിയിരുന്നില്ല.
പോലീസില് നല്കിയ പരാതിയുടെ അടിസ്ഥാനത്തില് ഡോഗ് സ്ക്വാഡിനെ സ്ഥലത്തെത്തിച്ച് അന്വേഷണം നടത്തിയതിന്റെ ഫലമായാണ് റുഖിയയുടെ മൃതദേഹം പുഴയില് നിന്ന് കണ്ടെത്തിയത്. പോലീസ് നായ മണംപിടിച്ച് പുഴയുടെ തീരത്ത് എത്തിയതോടെ പുഴയില് ചാടിയതാണോയെന്ന സംശയം ബലപ്പെട്ടിരുന്നു. തുടര്ന്നാണ് ചൊവ്വാഴ്ച മൃതദേഹം ലഭിച്ചത്.
