കുമളി : പെരിയാര് കടുവ സങ്കേതത്തോടുചേര്ന്ന മേഘമല വന്യജീവി സങ്കേതത്തില്നിന്ന് കൃഷിയിടത്തിലെത്തിയ പിടിയാനയെ ചരിഞ്ഞനിലയില് കണ്ടെത്തി. തേനി ജില്ലയിലെ തേവാരം താഴേയൂത്ത് മലയടിവാരത്തില് പാണ്ടി എന്നയാളുടെ കൃഷിയിടത്തിലാണ് ആനയെ ചരിഞ്ഞനിലയില് കണ്ടെത്തിയത്. ഈ ഭാഗത്ത് പതിവായി ആന, മ്ലാവ്, കാട്ടുപോത്ത് എന്നിവ കൃഷിയിടത്തിലിറങ്ങി കൃഷി നശിപ്പിക്കാറുണ്ട്.
കൃഷിയിടത്തിലിറങ്ങിയ ആന തോട്ടം കാവല്ക്കാരെ ഉള്പ്പെടെ കൊലപ്പെടുത്തിയ സംഭവവും ഈ മേഖലയില് പതിവാണ്. വന്യജീവികളുടെ ശല്യം ഒഴിവാക്കാന് നടത്തിയ ഏതെങ്കിലും ശ്രമത്തെ തുടര്ന്നാണോ ആന ചരിഞ്ഞതെന്ന സംശയം ശക്തമാണ്. ഉത്തമപാളയം റേഞ്ച് ഓഫിസറുടെ നേതൃത്വത്തില് വനപാലകര് സ്ഥലത്തെത്തി അന്വേഷണം ആരംഭിച്ചു. ജഡം പോസ്റ്റ്മോര്ട്ടത്തിനുശേഷം പ്രദേശത്ത് സംസ്കരിച്ചു.