മസ്കറ്റ് : സ്വർണക്കടയുടെ ചുമർ പൊളിച്ച് അകത്തുകയറി സ്വർണാഭരണങ്ങൾ കവർന്നെടുക്കാൻ ശ്രമിച്ച നാല് ഏഷ്യൻ സ്വദേശികളെ റോയൽ ഒമാൻ പോലീസ് അറസ്റ്റ് ചെയ്തു. ഒമാനിലെ മത്രാ വിലായത്തിൽ സ്വർണക്കടയുടെ ഭിത്തി തകർത്താണ് പ്രതികൾ അകത്തുകയറാൻ ശ്രമിച്ചതെന്നും സ്വർണാഭരണങ്ങൾ കവർന്നെടുക്കുകയായിരുന്നു ലക്ഷ്യമെന്നും റോയൽ ഒമാൻ പോലീസ് അറിയിച്ചു. സംഭവം പുറത്തുവന്നതോടെ മസ്കറ്റ് ഗവർണറേറ്റ് പോലീസ് കമാൻഡിന്റെ നേതൃത്വത്തിൽ വിശദമായ അന്വേഷണവും തിരച്ചിൽ നടപടികളും ആരംഭിച്ചു. വടക്കൻ അൽ ബതിന, ദോഫാർ പൊലീസ് കമാൻഡുകളുടെ സഹകരണത്തോടെയാണ് പ്രതികളെ തിരിച്ചറിഞ്ഞ് അറസ്റ്റ് ചെയ്തത്.
അന്വേഷണത്തിൽ, പ്രതികൾ മുൻകൂട്ടി ആസൂത്രണം ചെയ്താണ് സ്വർണക്കട ലക്ഷ്യമിട്ടതെന്ന് കണ്ടെത്തിയതായി പോലീസ് വ്യക്തമാക്കി. കടയുടെ ചുമർ പൊളിച്ച് അകത്ത് പ്രവേശിച്ച് വിലപിടിപ്പുള്ള ആഭരണങ്ങൾ കൈക്കലാക്കാനായിരുന്നു ശ്രമം. എന്നാൽ പോലീസ് നടത്തിയ വേഗത്തിലുള്ള ഇടപെടലിലൂടെ കവർച്ചാശ്രമം പരാജയപ്പെടുത്തുകയായിരുന്നു. സ്വത്ത് നശിപ്പിക്കൽ, കവർച്ചാശ്രമം തുടങ്ങിയ കുറ്റങ്ങളാണ് പ്രതികൾക്കെതിരെ ചുമത്തിയിരിക്കുന്നത്. അറസ്റ്റിലായ നാല് പേരുടെയും ദേശീയത ഏഷ്യൻ എന്ന വിവരം മാത്രമാണ് പോലീസ് പുറത്തുവിട്ടത്. ഇവർ ഏത് രാജ്യക്കാരാണെന്ന കാര്യം അധികൃതർ വ്യക്തമാക്കിയിട്ടില്ല.
