ബേപ്പൂർ : കോഴിക്കടയിൽ മൊത്ത കച്ചവടക്കാർ എത്തിച്ച കോഴികളിൽ നാലുകാലുള്ള കോഴിയെ കണ്ടെത്തി. മാറാട് വായനശാലക്ക് സമീപം വാട്ടർടാങ്ക് നൂർ ജുമാ മസ്ജിദിന് സമീപത്തെ വെറൈറ്റി ചിക്കൻ സ്റ്റാളിലാണ് വെറൈറ്റി കോഴിയെ കിട്ടിയത്. നാലു കാലുള്ള കോഴിയെ കിട്ടിയെന്നറിഞ്ഞതോടെ പ്രദേശത്തുകാർക്ക് കാണാൻ കൗതുകമായി.
മാറാട് സ്വദേശി വി.സി. ഷംസുദ്ദീന്റെ ഉടമസ്ഥതയിലുള്ള കടയിലേക്ക് മലപ്പുറം ഫാമിൽ നിന്ന് എത്തിച്ച ബ്രോയിലർ കോഴികളിൽ നിന്നാണ് രണ്ട് കിലോയോളം തൂക്കം വരുന്ന നാലുകാലുള്ള കോഴിയെ ലഭിച്ചത്. കോഴിയെ വിൽപനയിൽ നിന്ന് ഒഴിവാക്കി കൂട്ടിലിട്ട് വളർത്താനാണ് ഉടമസ്ഥന്റെ തീരുമാനം.