പത്തനംതിട്ട : വിവാഹം നടത്തി തരാമെന്ന് പറഞ്ഞ് മാട്രിമോണിയല് ഏജന്സികളുടെ പേരില് പണം തട്ടുന്ന സംഘങ്ങള് ജില്ലയില് വ്യാപകമാകുന്നു. വധുവിനെയും വരനെയും അന്വേഷിക്കുന്ന ആളുകളുടെ ഫോണ് നമ്പരുകള് തേടി പിടിച്ച് ഇവരെ ഫോണില് ബന്ധപ്പെടുകയും വിവാഹം നടത്തി തരാം എന്ന് പറഞ്ഞ് വിശ്വസിപ്പിക്കുകയും ചെയ്യും. പിന്നീട് ഇവരുടെ വിവരങ്ങള് ശേഖരിച്ച ശേഷം കുറച്ച് ആളുകള്ക്ക് താല്പര്യമുണ്ട് എന്ന തരത്തില് വീണ്ടും ബന്ധപ്പെടുകയും ഒരു നിശ്ചിത തുക തന്നാല് ഇവരുടെ ഫോണ് നമ്പര് തരാം എന്ന് പറയുകയും ചെയ്യുന്നു. വിവാഹം നടക്കുമല്ലോ എന്ന് കരുതി പണമടച്ച് നമ്പരുകള് അടങ്ങുന്ന കത്ത് പോസ്റ്റല് വഴി കയ്യില് കിട്ടുമ്പോഴാണ് ചതി മനസിലാകുക. തന്നിരിക്കുന്ന നമ്പരുകള് എല്ലാം നിലവിലില്ലാത്തതും വ്യാജവുമായിരിക്കും.
പിന്നീട് ഈ ഏജന്സികളെ ഫോണില് ബന്ധപ്പെടാന് ശ്രമിച്ചാല് കിട്ടുകയുമില്ല. കയ്യിലുള്ള പണവും ഉപഭോക്താക്കള്ക്ക് നഷ്ടമാകുന്നു. കഴിഞ്ഞ ദിവസമാണ് തണ്ണിത്തോട് സ്വദേശിയായ യുവാവിന് ഇത്തരത്തില് പണം നഷ്ടമായത്. സമൂഹ മാധ്യമങ്ങള് വഴി നമ്പരുകള് പ്രചരിപ്പിച്ചും ഇത്തരക്കാര് ആളുകളെ തട്ടിപ്പിന് ഇരയാക്കുന്നുണ്ട്. ഈ ചതിക്കുഴി മനസിലാകാതെ ജില്ലയില് നിരവധി യുവതി യുവാക്കളും കുടുംബങ്ങളുമാണ് ചതിയില്പ്പെട്ടത്. തട്ടിപ്പിന് ഇരയായവര് ഇവര്ക്ക് എതിരെ പരാതി നല്കിയിട്ടും കാര്യമില്ല. സൈബര് സെല്ലും പോലീസും നമ്പരുകള് കേന്ദ്രീകരിച്ച് നടത്തുന്ന അന്വേഷണത്തില് പലപ്പോഴും ഇവരെ പിടികൂടുവാനും കഴിയാറില്ല. ഇത്തരത്തില് വലിയ സംഘങ്ങള് ജില്ലയില് പ്രവര്ത്തിക്കുന്നു എന്നാണ് ലഭിക്കുന്ന വിവരം.
