മംഗളൂരു: കര്ണാടകയില് മേയ് 10ന് നടക്കുന്ന നിയമസഭാ തെരഞ്ഞെടുപ്പിന് മുന്നോടിയായി വനിതകള്ക്ക് സൗജന്യയാത്ര വാഗ്ദാനം ചെയ്ത് കോണ്ഗ്രസ്. മംഗലാപുരത്ത് തെരഞ്ഞെടുപ്പ് പ്രചരണത്തിനിടെ രാഹുല് ഗാന്ധിയാണ് പ്രഖ്യാപനം നടത്തിയത്. ‘കര്ണാടകയില് അധികാരത്തില് എത്തിയാല് ആദ്യദിനം മുതല് വാഗ്ദാനം പാലിക്കും’ എന്നാണ് രാഹുല് പറഞ്ഞത്.
അഴിമതിയിലൂടെ ബിജെപി കര്ണാടകയിലെ പണം അപഹരിക്കുകയാണെന്നും നാടിന്റെ സമ്പത്ത് ജനങ്ങള്ക്കു തന്നെ നല്കുക എന്നതാണ് കോണ്ഗ്രസിന്റെ നയം എന്നും രാഹുല് ഗാന്ധി മംഗലാപുരത്ത് പറഞ്ഞു. എല്ലാ വീടുകളിലും 200 യൂണിറ്റ് സൗജന്യ വൈദ്യുതി, ബിപിഎല് കുടുംബത്തിലെ ഓരോ അംഗത്തിനും 10 കിലോ സൗജന്യ അരി, ഓരോ കുടുംബത്തിലെയും സ്ത്രീക്ക് പ്രതിമാസം 2000 രൂപ ധനസഹായം, ബിരുദധാരികളായ യുവാക്കള്ക്ക് പ്രതിമാസം 3000 എന്നിങ്ങനെയാണ് കോണ്ഗ്രസിന്റെ മറ്റു വാഗ്ദാനങ്ങള്.