ദില്ലി: പ്രതിരോധമന്ത്രി രാജ്നാഥ് സിംഗ് ചൈനീസ് പ്രതിരോധ മന്ത്രി ജനറല്‍ ലി ഷാങ്ഫുവുമായി ചര്‍ച്ച നടത്തി. നിയന്ത്രണ രേഖയിലെ പ്രശ്‌നങ്ങള്‍ പരിഹരിക്കണമെന്ന് ഇന്ത്യ ചൈനയോട് ആവശ്യപ്പെട്ടു. അതിര്‍ത്തിയിലെ സമാധാനമാണ് ഇരു രാജ്യങ്ങളും തമ്മിലുള്ള ബന്ധത്തിന് അടിത്തറയെന്ന് രാജ്നാഥ് സിംഗ് പറഞ്ഞു. 2020ല്‍ ലഡാക്കിലെ ഗാല്‍വാന്‍ താഴ് വരയില്‍ ഇരുരാജ്യങ്ങളുടെയും സൈന്യം ഏറ്റുമുട്ടിയതിന് ശേഷം ആദ്യമായാണിത്. ഷാങ്ഹായ് കോ-ഓപ്പറേഷന്‍ ഓര്‍ഗനൈസേഷന് (എസ്സിഒ) മുന്നോടിയായാണ് ചര്‍ച്ച നടന്നത്.
ഇരു രാജ്യങ്ങളും തമ്മിലുള്ള നിലവിലുള്ള കരാറുകളുടെ ലംഘനം ഉഭയകക്ഷി ബന്ധത്തിന്റെ മുഴുവന്‍ അടിത്തറയും ഇല്ലാതാക്കിയതായി അദ്ദേഹം അഭിപ്രായപ്പെട്ടു. ചീഫ് ഓഫ് ഡിഫന്‍സ് സ്റ്റാഫ് ജനറല്‍ അനില്‍ ചൗഹാന്‍, പ്രതിരോധ സെക്രട്ടറി ഗിരിധര്‍ അരമന എന്നിവരും കൂടിക്കാഴ്ചയില്‍ പങ്കെടുത്തു. കേന്ദ്ര പ്രതിരോധമന്ത്രാലയമാണ് ഇരു പ്രതിരോധമന്ത്രിമാരും തമ്മില്‍ കൂടിക്കാഴ്ച നടത്തിയ വിവരം അറിയിച്ചത്.
