ന്യൂഡല്ഹി : രാജ്യത്ത് ഇന്ധനവില വീണ്ടും കൂട്ടി. പെട്രോള് ലിറ്ററിന് 29പൈസയും ഡീസലിന് 31 പൈസയുമാണ് കൂട്ടിയത്. തിരുവനന്തപുരത്ത് പെട്രോള് വില 98.45 രൂപയായി. ഡീസലിന് 93.79 രൂപയും. ഇന്ധനവില വര്ധന തുടര്ന്നാല് കേരളത്തില് സാധാരണ പെട്രോള് വില അടുത്തുതന്നെ സെഞ്ച്വറിയടിക്കും. പ്രീമിയം പെട്രോള് വില കേരളത്തില് 100 കടന്നിരുന്നു.
42 ദിവസത്തിനിടെ 24ാമത്തെ തവണയാണ് ഇന്ധനവില കൂട്ടുന്നത്. ചെന്നൈയില് പെട്രോളിന് 97.43 രൂപയും ഡീസലിന് 91.64 രൂപയുമാണ്. ഡല്ഹിയില് പെട്രോളിന് 96.12 രൂപയും ഡീസലിന് 86.98 രൂപയുമാണ്. കൊല്ക്കത്ത പെട്രോള് വില 96.06 രൂപ, ഡീസലിന് 89.83 രൂപ. മുംബൈയില് 102.30 രൂപയാണ് പെട്രോള് വില. ഡീസലിന് 94.39 രൂപയും. അതേസമയം ആഗോളവിപണിയില് അസംസ്കൃത എണ്ണക്കുണ്ടായ വിലവര്ധനയാണ് പെട്രോള് ഡീസല് വില ഉയരാന് കാരണമെന്നാണ് എണ്ണക്കമ്പിനികളുടെ വാദം.
ഇന്ധനവില വര്ധന ജനങ്ങള്ക്ക് ബുദ്ധിമുട്ട് സൃഷ്ടിക്കുമെങ്കിലും വാക്സിന് വാങ്ങുന്നതിനായി കോടിക്കണക്കിന് രൂപ ചെലവാക്കുകയാണെന്നായിരുന്നു പെട്രോളിയം മന്ത്രി ധര്മേന്ദ്രപ്രധാന്റെ പ്രതികരണം. രാജ്യത്ത് ഇന്ധനവില വര്ധിക്കുന്നതോടെ അവശ്യ വസ്തുക്കളുടെയും ഗതാഗത സംവിധാനങ്ങളുടെയും നിരക്ക് ഉയരുന്നത് സാധാരണ ജനങ്ങള്ക്ക് തിരിച്ചടിയാകും.
