എരുമേലി: എരുമേലിയില് ഫര്ണിച്ചര് വര്ക്ക്ഷോപ്പില് തീപിടിത്തം. മങ്ങാട്ട് ജെയ്മോന്റെ ഫര്ണിച്ചര് വര്ക്ക് ഷോപ്പിലാണ് അഗ്നിബാധയുണ്ടായത്. പുലര്ച്ചെ മൂന്നോടെയാണ് സംഭവം. തൊട്ടടുത്തുള്ള ഹോട്ടലില് ഷോര്ട്ട് സര്ക്യൂട്ട് മൂലം തീപടര്ന്ന് കര്ട്ടന് നെറ്റ് കത്തി ജെയ്മോന്റെ കടയ്ക്കുള്ളില് വീണാണ് അഗ്നിബാധയുണ്ടായത്. ശബരിമല സീസണ് മുന്നിര്ത്തി ആരംഭിച്ച താത്കാലിക യൂണിറ്റില് നിന്നും അഗ്നിശമന സേനയെത്തി തീയണച്ചെങ്കിലും ലക്ഷങ്ങള് വിലയുള്ള ഫര്ണീച്ചര് ഉപകരണങ്ങള് കത്തി നശിച്ചിരുന്നു.
ശബരിമല സീസണാരംഭത്തിനിടെ പോലീസ് സ്റ്റേഷനുസമീപം കടയില് പുലര്ച്ചെയുണ്ടായ തീപിടിത്തം ആശങ്ക പരത്തി. കടകളില് അഗ്നിശമന ഉപകരണം നിര്ബന്ധമാക്കണമെന്ന ആവശ്യം ഇതോടെ ശക്തമായി. ഇത്തവണ ശബരിമല തീര്ഥാടന മുന്നൊരുക്ക യോഗത്തില് സീസണ് കടകളില് അഗ്നി ശമന ഉപകരണം നിര്ബന്ധമാക്കാന് തീരുമാനിച്ചിരുന്നു. ഇവ ഇല്ലെങ്കില് കടകളുടെ ലൈസന്സ് റദ്ദാക്കാനും നിര്ദേശിച്ചിരുന്നു. മണ്ഡലകാലം ആരംഭിച്ചിട്ടും ഈ തീരുമാനം നടപ്പില് വന്നിട്ടില്ല.