അഞ്ചല് : വിദ്യാര്ഥികള്ക്ക് കഞ്ചാവ് വില്പന നടത്തുന്നത് ചോദ്യംചെയ്തയാളെ കഞ്ചാവ് കേസില് ജാമ്യത്തിലിറങ്ങിയപ്രതി യുവാവിനെ ആക്രമിച്ചു പരിക്കേല്പ്പിച്ചു. തലയ്ക്ക് ഗുരുതര പരിക്കേറ്റ അലയമണ് കരുകോണ് കുട്ടിനാട് സ്വദേശി മനു (31) വിനെ തിരുവനന്തപുരം മെഡിക്കല് കോളജ് ആശുപത്രിയില് പ്രവേശിപ്പിച്ചു. സംഭവവുമായി ബന്ധപ്പെട്ട് കുട്ടിനാട് ബിബിന് ഭവനില് വിഷ്ണു (19) വിനെ അഞ്ചല് പോലീസ് അറസ്റ്റ് ചെയ്തു. ഏതാനും ദിവസംമുമ്പ് കഞ്ചാവ് കേസില് പിടിക്കപ്പെട്ട് സ്റ്റേഷന് ജാമ്യത്തില് പുറത്തിറങ്ങിയ ആളാണ് വിഷ്ണു. പോലീസ് പിടിക്കാന് കാരണം മനുവാണെന്നാരോപിച്ച് കഞ്ചാവ് വലിച്ച് പുക മുഖത്തേക്ക് ഊതി വിടുകയും കല്ലുകൊണ്ട് തലയ്ക്കടിക്കുകയായിരുന്നുവെന്ന് പറയപ്പെടുന്നു. സംഭവത്തിനുശേഷം രക്ഷപെടാന് ശ്രമിച്ച വിഷ്ണുവിനെ കരുകോണില് നിന്ന് പോലീസ് കസ്റ്റഡിയിലെടുത്തു. പുനലൂര് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
