തൃശൂര്‍ : തൃശൂര്‍ മെഡിക്കല്‍ കോളേജില്‍ സംഘടിപ്പിച്ച സെമിനാര്‍ വിവാദമാകുന്നു. ജെന്‍ഡര്‍ പൊളിറ്റിക്സ് എന്ന വിഷയത്തിലായിരുന്നു സെമിനാര്‍. ആണ്‍ – പെണ്‍ വിദ്യാര്‍ത്ഥികളെ തുണികൊണ്ട് മറകെട്ടി വേര്‍തിരിച്ചതാണ് വിവാദത്തിന് കാരണമായത്. മുജാഹിദ് വിസ്ഡം ഗ്രൂപ്പിന്റെ നേതൃത്വത്തില്‍ ജൂണ്‍ ആറിനായിരുന്നു സെമിനാര്‍ സംഘടിപ്പിച്ചത്. വിസ്ഡം നേതാവ് അബ്ദുള്‍ ബേസില്‍ ആയിരുന്നു പരിപാടി ഉദ്ഘാടനം ചെയ്തത്. പരിപാടിയുടെ ചിത്രങ്ങള്‍ സമൂഹമാദ്ധ്യമങ്ങളില്‍ പ്രചരിച്ചതോടെയാണ് വിമര്‍ശനം ഉയര്‍ന്നത്.
വിസ്ഡം ഗ്രൂപ്പിന്റെ തന്നെ വിദ്യാര്‍ത്ഥി നേതാക്കളാണ് പരിപാടിയുടെ ചിത്രങ്ങള്‍ ഫേസ്ബുക്കില്‍ പോസ്റ്റ് ചെയ്തത്. ഇതിനുപിന്നാലെ വിമര്‍ശനവുമായി നിരവധി പേരാണ് സോഷ്യല്‍ മീഡിയയിലൂടെ രംഗത്തെത്തിയത്. അതേസമയം, പരിപാടിക്ക് കോളേജ് യൂണിയനുമായി യാതൊരു ബന്ധവുമില്ലെന്ന് അധികൃതര്‍ പ്രതികരിച്ചു.
