കൊച്ചി : സ്വര്ണ്ണക്കടത്ത് കേസ് പ്രതി സന്ദീപ് നായരില് നിന്ന് പിടിച്ചെടുത്ത ബാഗില്നിന്നു കണ്ടെത്തിയത് ഡയറികളും കടലാസുകെട്ടുകളും. ദേശീയ അന്വേഷണ ഏജന്സി ജഡ്ജി കൃഷ്ണകുമാറിന്റെ സാന്നിധ്യത്തിലാണ് ബാഗ് തുറന്നു പരിശോധിച്ചത്. ഇതില് കോഡു വാക്കുകളും ചിഹ്നങ്ങളും രേഖപ്പെടുത്തിയ കടലാസുകള് ഏറെയുണ്ടെന്നാണ് സൂചന.
പരിശോധനയില് നിര്ണായക വിവരങ്ങള് അന്വേഷണസംഘത്തിന് ലഭിച്ചതായാണ് സൂചന. പരിശോധനാ നടപടികള് പൂര്ണമായി ക്യാമറയില് പകര്ത്തിയിരുന്നു. ഡയറിയുടെ ഓരോ പേജിനും നമ്പറിട്ട് ഉള്ളടക്കം രേഖപ്പെടുത്തി കോടതിയില് റിപ്പോര്ട്ട് സമര്പ്പിക്കുന്ന നടപടികള് രാത്രി വൈകിയും തുടര്ന്നു.
അതിനിടെ കസ്റ്റംസ് ചോദ്യംചെയ്യല് പൂര്ത്തിയാക്കിയ ഒന്നാംപ്രതി സരിത്തിന്റെ അറസ്റ്റ് രേഖപ്പെടുത്തിയ എന്ഐഎ പ്രതിയെ കസ്റ്റഡിയില് വാങ്ങി ചോദ്യം ചെയ്യാനുള്ള ഒരുക്കത്തിലാണ്. ഹൃദയ ശസ്ത്രക്രിയക്ക് ഒരുങ്ങുന്ന പിതാവിനെ കാണാനുള്ള ആഗ്രഹം സരിത്ത് കോടതിയെ അറിയിച്ചു. ജയിലില് അതിനുള്ള അവസരം നല്കാന് കോടതി നിര്ദ്ദേശിച്ചിട്ടുണ്ട്.
