അമ്പലപ്പുഴ : അപകടത്തില് തകര്ന്ന ഗുഡ്സ് ഓട്ടോ കാല്നടക്കാര്ക്ക് തടസ്സമായി നടപ്പാതയില് കിടപ്പായിട്ട് ഒരു മാസം.
പോലീസ് ഉന്നതര് ഉള്പ്പെടെയുള്ളവരുടെ ശ്രദ്ധയില്പെട്ടിട്ടും വാഹനം നീക്കാന് ഇനിയും നടപടി ആയിട്ടില്ല. ദേശീയപാതയില് കാക്കാഴം മേല്പാലത്തില് ജൂണ് അഞ്ചിനാണ് കുഴിയില്വീണ് നിയന്ത്രണംവിട്ട ഓട്ടോ മറിഞ്ഞത്.
അപകടത്തില് ദമ്പതികള്ക്ക് ഗുരുതര പരിക്കേല്ക്കുകയും ചെയ്തിരുന്നു. കായംകുളം കരീലക്കുളങ്ങര കൊറ്റുകുളങ്ങര ചാങ്ങയില് വടക്കതില് ഹാഷിം (40), ഭാര്യ റസീന (36) എന്നിവര്ക്കാണ് പരിക്കേറ്റത്. രാത്രി പത്തോടെ കായംകുളം ഭാഗത്തേക്ക് പോകുകയായിരുന്ന വാഹനം പാലത്തിലെ കുഴിയില് വീണ് മറിയുകയായിരുന്നു.
പിന്നാലെയെത്തിയ പിക്അപ് വാന് ഓട്ടോയിലിടിച്ചതോടെ വാഹനം പൂര്ണമായി തകര്ന്നു. അമ്പലപ്പുഴ പോലീസും നാട്ടുകാരും ചേര്ന്നാണ് ഓട്ടോ മേല്പാലത്തിലെ നടപ്പാതയിലേക്ക് മാറ്റിയത്. ഒരു മാസമായിട്ടും വാഹനം മാറ്റാന് നടപടിയുണ്ടായിട്ടില്ല. കാല്നടക്കാരായ നിരവധി പേരാണ് ദിവസവും ഇതുവഴി കടന്നുപോകുന്നത്. വാഹനം കിടക്കുന്നതുമൂലം കാല്നടക്കാര് പാലത്തിന്റെ അടിഭാഗത്തുകൂടി റെയില്പാളം മുറിച്ചാണ് യാത്ര ചെയ്യുന്നത്. ഇത് അപകടങ്ങള്ക്ക് വഴിയൊരുക്കാനും ഇടയുണ്ട്.
