കൊല്ലം : ചിതറയില്‍ പ്ലസ് ടു വിദ്യാര്‍ഥിയെയും അമ്മയെയും നടുറോഡിലിട്ട് ക്രൂരമായി മര്‍ദ്ദിച്ച ശേഷം ഒളിവില്‍ പോയ ഗുണ്ടാ നേതാവ് അറസ്റ്റില്‍. വധശ്രമ കേസുകളില്‍ അടക്കം പ്രതിയായ കൊട്ടോടി നിസാമിനെ ഒരു മാസത്തിലേറെ നീണ്ട അന്വേഷണത്തിനൊടുവിലാണ് പൊലീസ് അറസ്റ്റ് ചെയ്തു. കഴിഞ്ഞ മാസം പതിനേഴിനാണ് നാലുമുക്ക് സ്വദേശിയായ പ്ലസ്ടു വിദ്യാര്‍ഥിക്ക് നടുറോഡില്‍ മര്‍ദനമേറ്റത്.
ഗുണ്ടാ നേതാവായ കൊട്ടോടി നിസാമും മറ്റ് രണ്ട് പേരും ചേര്‍ന്ന് വിദ്യാര്‍ഥിയെ മര്‍ദ്ദിക്കുന്നതു കണ്ട് തടസം പിടിക്കാനെത്തിയ കുട്ടിയുടെ അമ്മയെയും അക്രമികള്‍ മര്‍ദ്ദിച്ചു. ഈ സംഭവത്തിനു ശേഷം ഒളിവില്‍ പോയ നിസാമിനായി പൊലീസ് അന്വേഷണം നടക്കുകയായിരുന്നു. ഒളിവില്‍ കഴിയുകയായിരുന്ന നിസാം കഴിഞ്ഞ ദിവസം നാട്ടിലെത്തി.
ഇക്കാര്യമറിഞ്ഞ പൊലീസ് മഫ്തിയില്‍ പിന്തുടര്‍ന്നു. തലവരമ്ബ് ജംഗ്ഷനില്‍ നാട്ടുകാരില്‍ ചിലരെ അസഭ്യം പറയുന്നതിനിടെ പൊലീസ് നിസാമിനെ പിടികൂടുകയായിരുന്നു. പൊലീസ് സ്റ്റേഷനില്‍ നിസാമിന്റെ ദൃശ്യങ്ങള്‍ പകര്‍ത്താനെത്തിയ മാധ്യമ പ്രവര്‍ത്തകനെ മര്‍ദ്ദിക്കാന്‍ നിസാമിന്റെ കൂട്ടാളി അമ്ബു എന്ന വിഷ്ണുവും ശ്രമിച്ചിരിന്നു. ഇയാളെയും പൊലീസ് കസ്റ്റഡിയില്‍ എടുത്തു.
