പാറശാല : മുന്‍വൈരാഗ്യത്തിന്റെ പേരില്‍ സിപിഎം പ്രാദേശിക നേതാവിന്റെ നേതൃത്വത്തിലുള്ള 11 അംഗസംഘം വീടുകയറി നടത്തിയ അക്രമത്തില്‍ യുവാവിന് ഗുരുതര പരുക്കേറ്റു. സിപിഎം പാറശാല ഏരിയ കമ്മിറ്റി അംഗവും കുളത്തൂര്‍ മുന്‍ എല്‍സി സെക്രട്ടറിയുമായ ഉച്ചക്കട സുരേഷാണ് അക്രമത്തിന് നേതൃത്വം നല്‍കിയത്‌. സുരേഷ് നിലവില്‍ ഒളിവിലാണ്. ഹെല്‍മറ്റ് ധരിച്ചാണ് സുരേഷ് അക്രമത്തിനു നേതൃത്വം നല്‍കിയതെന്നാണ് പരാതി. പൊഴിയൂര് ചാമവിള ന്യൂ ബംഗ്ലാവില്‍ നൈസാമിന്റെ വീട്ടില്‍ കഴിഞ്ഞ ദിവസം രാത്രി 10.35നു ആണ് സംഭവം. നൈസാമിന്റെ സുഹൃത്ത് കോട്ടയം സ്വദേശി ജെയിന്‍ ആണ് പരുക്കേറ്റത്.
ഞായറാഴ്ച നടന്ന സുഹൃത്തിന്റെ വിവാഹത്തില്‍ പങ്കെടുക്കാന്‍ ആണ് ജെയിന്‍ അടക്കമുള്ളവര്‍ പൊഴിയൂരില് എത്തിയത്. വിവാഹ ചടങ്ങുകള്‍ക്ക് ശേഷം രാത്രി നൈസാമിന്റെ വീട്ടില്‍ ഒത്തു കൂടിയപ്പോള്‍ ആയിരുന്നു ആക്രമണം ഉണ്ടായത്. വാഹനങ്ങളില്‍ എത്തിയ സംഘത്തെ കണ്ട് വീട്ടുകാര്‍ അടക്കം ഒ‍ാടി രക്ഷപ്പെട്ടെങ്കിലും ജെയിന്‍ ഇവരുടെ കയ്യില്‍ പെടുകയായിരുന്നു. അക്രമി സംഘത്തില്‍ പെട്ട അരുണ്‍, പ്രജിത്ത് എന്നിവരെ പോലീസ് അറസ്റ്റു ചെയ്തു. അക്രമ ദൃശ്യങ്ങള്‍ വീട്ടിലെ സിസിടിവിയില്‍ നിന്ന് പോലീസ് ശേഖരിച്ചു. വീടിനു മുന്നില്‍ പാ‍ര്‍ക്ക് ചെയ്തിരുന്ന കാര്‍, ഒ‍ാട്ടോ, ബൈക്ക്, മതിലില്‍ ഉണ്ടായിരുന്ന ലൈറ്റുകള്‍ തുടങ്ങിയവ തകര്‍ത്ത ശേഷം ആണ് സംഘം മടങ്ങിയത്.
