ലഖ്നോ : ഗോരഖ്പൂരില് ഉത്തര്പ്രദേശ് പ്രൊവിന്ഷ്യല് ആര്മ്ഡ് കോണ്സ്റ്റാബുലറി (യു.പി പി.എ.സി) ഉദ്യോഗസ്ഥരെ മര്ദിച്ച സംഭവത്തില് അഞ്ച് പേര് പിടിയില്. ഗോരഖ്പൂരിലെ ഗോരഖ്നാഥ് ക്ഷേത്രത്തിന് പുറത്ത് ഞായറാഴ്ചയായിരുന്നു സംഭവം. ആക്രമണത്തില് രണ്ട് പോലീസ് കോണ്സ്റ്റബിള്മാര്ക്ക് പരിക്കേറ്റതായി എ.ഡി.ജി അഖില് കുമാര് പറഞ്ഞു. യു.പി മുഖ്യമന്ത്രി യോഗി ആദിത്യനാഥ് ആണ് ക്ഷേത്രത്തിന്റെ പ്രധാന പൂജാരി. എന്നാല് സംഭവം നടക്കുമ്പോള് അദ്ദേഹം സ്ഥലത്തുണ്ടായിരുന്നില്ലെന്ന് പോലീസ് പറഞ്ഞു. ആക്രമണത്തിന് പിന്നില് തീവ്രവാദ സംഘങ്ങളാകാമെന്ന സംശയത്തെ തുടര്ന്ന് പോലീസ് വിവിധ ജില്ലകളില് റെയ്ഡ് നടത്തിയിരുന്നു. ഇതിന് പിന്നാലെ കുശിനഗര്, സാന്റ് കബീര്നഗര്, മഹാരാജ്ഗഞ്ച് എന്നിവിടങ്ങളില് നിന്ന് പ്രതികളെ പിടികൂടുകയായിരുന്നു.
ഞായറാഴ്ച രാത്രി എട്ട് മണിയോടെയായിരുന്നു സംഭവം. ഗോരഖ്പൂരില് നിന്നുള്ള ഐ.ഐ.ടി – ബോംബെ ബിരുദധാരിയായ പ്രതി അഹമ്മദ് മുര്താസ അബ്ബാസി മതപരമായ മുദ്രാവാക്യങ്ങള് ഉയര്ത്തി ബലം പ്രയോഗിച്ച് ക്ഷേത്രത്തിന് അകത്ത് കടക്കാന് ശ്രമിച്ചു. ഇത് തടഞ്ഞ പി.എ.സി ഉദ്യോഗസ്ഥരെ പ്രതി മൂര്ച്ചയേറിയ ആയുധം ഉപയോഗിച്ച് ആക്രമിച്ചു. ആക്രമണം ഗൂഢാലോചനയുടെ ഭാഗമാണെന്ന് എ.ഡി.ജി പറഞ്ഞു. ക്ഷേത്ര കവാടത്തില് നിന്ന് ലാപ്ടോപ്പ്, ഐ.ഡി കാര്ഡുകള് എന്നിവ ഉള്പ്പെട്ട അബ്ബാസിയുടെ ബാഗ് പോലീസ് കണ്ടെടുത്തു. പ്രതിയില് നിന്ന് മൊബൈല് ഫോണും പിടികൂടിയിട്ടുണ്ട്. കഴിഞ്ഞ കുറച്ച് മാസങ്ങളായുള്ള പ്രതിയുടെ നീക്കങ്ങളുടെയും സമ്പര്ക്കങ്ങളുടെയും വിശദാംശങ്ങള് ശേഖരിക്കുമെന്ന് പോലീസ് അറിയിച്ചു. ലാപ്ടോപ്പും മൊബൈല് ഫോണും വിദഗ്ധ പരിശോധനക്ക് കൈമാറി.
