തൊടുപുഴ : പട്ടികവര്ഗ വികസന വകുപ്പിന്റെ ആഭിമുഖ്യത്തില് സംഘടിപ്പിക്കുന്ന പാരമ്പര്യ ഗോത്രകലാ പ്രദര്ശന വിപണന മേള ‘ഉണര്വ് 2022’ തൊടുപുഴ ഗാന്ധി സ്ക്വയറിന് സമീപം റ്റി.ജെ.ജോസഫ് മെമ്മോറിയല് ഗ്രൗണ്ടില് മാര്ച്ച് 21, 22 തീയതികളില് നടക്കും. 21ന് രാവിലെ 10.30 ന് ജലവിഭവ വകുപ്പ് മന്ത്രി റോഷി അഗസ്റ്റിന് മേള ഉദ്ഘാടനം ചെയ്യും. യോഗത്തിന് പി. ജെ ജോസഫ് എം.എല്.എ അദ്ധ്യക്ഷത വഹിക്കും. അഡ്വ. ഡീന് കുര്യാക്കോസ് എം.പി മുഖ്യാതിഥിയാകും. ജില്ലാകളക്ടര് ഷീബാ ജോര്ജ് മുഖ്യ പ്രഭാഷണം നടത്തും.
ഗോത്ര കലാകാരന്മാര്ക്കും പരമ്ബരാഗത ഉത്പാദകര്ക്കും കൊവിഡ് പ്രതിസന്ധി തരണം ചെയ്യുന്നതിന് ഉല്പന്നങ്ങളുടെ പ്രദര്ശനവും വിപണനവും ഒപ്പം ഗോത്ര സംസ്കാരവും കലാരൂപങ്ങളും മുഖ്യധാരയ്ക്ക് പരിചയപ്പെടുത്തലുമാണ് മേളയിലൂടെ ലക്ഷ്യമിടുന്നത്. മേളയോടനുബന്ധിച്ച് വൈകീട്ട് 5.30, 6.15, 7.15 എന്നീ സമയങ്ങളില് ഗോത്രകലകളായ ഊരാളിക്കൂത്ത്, മലപ്പുലയ ആട്ടം, പളിയ നൃത്തം, കൊലവയാട്ടം, പരിചമുട്ടുകളി, മന്നാക്കൂത്ത് എന്നിവ നടക്കും. യോഗത്തില് ഐ.റ്റി.ഡി.പി. പ്രോജക്ട് ഓഫീസര് കെ.എസ്.ശ്രീരേഖ വിഷയാവതരണം നടത്തും.
തൊടുപുഴ നഗരസഭാ ചെയര്മാന് സനീഷ് ജോര്ജ് സ്വാഗതവും അടിമാലി ട്രൈബല് ഡെവലപ്പ്മെന്റ് ഓഫീസര് എസ്.എ. നജീം നന്ദിയും പറയും. അടിമാലി ബ്ലോക്ക് പഞ്ചായത്ത് പ്രസിഡന്റ് സോമന് ചെല്ലപ്പന്, കുടയത്തൂര് ഗ്രാമ പഞ്ചായത്ത് പ്രസിഡന്റ് ഉഷ വിജയന്, ജില്ലാ പഞ്ചായത്തംഗം സി.രാജേന്ദ്രന്, കോഴിമല രാജാവ് രാമന് രാജമന്നാന്, ജനപ്രതിനിധികള്, വിവിധ രാഷ്ട്രീയ പാര്ട്ടി പ്രതിനിധികള് തുടങ്ങിയവര് പങ്കെടുക്കും.
