പത്തനംതിട്ട : വരുന്ന ത്രിതല പഞ്ചായത്ത്, മുന്‍സിപ്പല്‍ തെരഞ്ഞെടുപ്പില്‍ മാനദണ്ഡങ്ങള്‍ക്ക് വിരുദ്ധമായി ഭരണപക്ഷ ഉദ്യോഗസ്ഥ സംഘത്തെ ഉപയോഗിച്ച് വാര്‍ഡ് വിഭജനം നടത്തുവാന്‍ നീക്കം ഉണ്ടായാല്‍ രാഷ്ട്രീയമായും നിയമപരമായും ചെറുക്കുമെന്ന് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ ചേര്‍ന്ന ജില്ലയിലെ കോണ്‍ഗ്രസ് ബ്ലോക്ക് പ്രസിഡന്‍റുമാരുടെ യോഗം മുന്നറിയിപ്പ് നല്‍കി. തദ്ദേശ സ്വയംഭരണ സ്ഥാപനങ്ങളിലെ ജനപ്രതിനിധികളെയും വിവിധ രാഷ്ട്രീയ പാര്‍ട്ടി പ്രതിനിധികളെയും വിശ്വാസത്തിലെടുത്ത് അവരുമായി കൂടിയാലോചിച്ച് മാനദണ്ഡങ്ങള്‍ പാലിച്ചു മാത്രമേ ഓരോ വാര്‍ഡ് വീതം വര്‍ദ്ധിപ്പിക്കുന്ന രീതിയില്‍ വിഭജനം പാടുള്ളൂ എന്ന് യോഗം ആവശ്യപ്പെട്ടു. 2011 ലെ സെന്‍സസിന്‍റെ അടിസ്ഥാനത്തില്‍ നടത്തുവാന്‍ ഉദ്ദേശിക്കുന്ന ത്രിതല പഞ്ചായത്ത്, മുന്‍സിപ്പല്‍ തെരഞ്ഞെടുപ്പിന് മുമ്പായി വോട്ടര്‍പട്ടിക ശുദ്ധീകരിക്കുവാന്‍ തീവ്രവും കുറ്റമറ്റതുമായ സംവിധാനം ഒരുക്കണമെന്ന് നേതൃയോഗം സര്‍ക്കാരിനോട് ആവശ്യപ്പെട്ടു.
ജൂണ്‍ 4 ന് നടക്കുന്ന ലോക്സഭ തെരഞ്ഞെടുപ്പ് വോട്ടെണ്ണല്‍ സംബന്ധിച്ച ക്രമീകരണങ്ങള്‍ യോഗം ചര്‍ച്ച ചെയ്തു. ഡി.സി.സി പ്രസിഡന്‍റ് പ്രൊഫ. സതീഷ് കൊച്ചുപറമ്പില്‍ അദ്ധ്യക്ഷത വഹിച്ചു. ഡി.സി.സി ജനറല്‍ സെക്രട്ടറിമാരായ സാമുവല്‍ കിഴക്കുപുറം, സജി കൊട്ടയ്ക്കാട്, ജി. രഘുനാഥ്, കെ. ജാസിംകുട്ടി, റോജിപോള്‍ ഡാനിയേല്‍, ബ്ലോക്ക് പ്രസിഡന്‍റുമാരായ എസ്. ബിനു, സക്കറിയ വര്‍ഗീസ്, പ്രൊഫ. പി.കെ മോഹന്‍രാജ്, ദീനാമ്മ റോയി, ആര്‍. ദേവകുമാര്‍, ജെറി മാത്യു സാം, എബി മേക്കരിങ്ങാട്ട്, സിബി താഴത്തില്ലെത്ത്, കെ. ശിവപ്രസാദ്, തെരഞ്ഞെടുപ്പ് വാര്‍ റും കോ-ഓര്‍ഡിനേറ്റര്‍ എ. അബ്ദുള്‍ ഹാരിസ് എന്നിവര്‍ പ്രസംഗിച്ചു. രാജീവ് ഗാന്ധി പഞ്ചായത്ത് രാജ് സംഘടന്‍റെ നേതൃത്വത്തില്‍ മെയ് 31 ന് രാവിലെ 10 മണിക്ക് ജില്ലയിലെ കോണ്‍ഗ്രസ് ജനപ്രതിനിധികളുടെ കണ്‍വെന്‍ഷന്‍ ചേരുന്നതിന് യോഗം തീരുമാനിച്ചു.
