വടശ്ശേരിക്കര : വടശ്ശേരിക്കരയില് കാടുകയറി കിടക്കുന്ന സര്ക്കാര് ഭൂമി പൊതു ജനങ്ങള്ക്ക് ഭീഷണിയാകുന്നു. വില്ലേജ് ഓഫീസിന് സമീപമാണ് സര്ക്കാര് ഭൂമി വര്ഷങ്ങളായി കാടുകയറി കിടക്കുന്നത്. പഴയ സര്ക്കാര് കെട്ടിടങ്ങള് അടക്കം കാടുകയറി കിടപ്പുണ്ട്. ഇഴജന്തുക്കളുടെ ശല്യം വ്യാപകമായതോടെ പകല് പോലും ഇവിടേക്ക് ആളുകള് വരാന് മടിക്കുന്നുണ്ട്. വനമേഖലയോട് ചേര്ന്ന പ്രദേശമായതിനാല് പലതവണ ഇതിന് സമീപം കാട്ടാനകള് വന്നിട്ടുണ്ട്. പകല് സമയങ്ങളില് പോലും കെട്ടിടത്തിന് സമീപത്തോ റോഡിലോ കാട്ടാനകള് നിന്നാല് വാഹനയാത്രക്കാര്ക്ക് കാണുവാനും പ്രയാസമാവും. സ്വകാര്യ ഭൂമിയിലെ കാടുകള് വെട്ടിത്തെളിക്കുവാന് കോടതി ഉത്തരവ് നിലവിലുണ്ട് എങ്കിലും ജില്ലയിലെ സര്ക്കാര് ഭൂമിയില് കയറി കിടക്കുന്ന കാടുകള് ജനങ്ങളുടെ സുരക്ഷയ്ക്ക് വലിയ ഭീഷണിയാകുന്നുണ്ട്.
സര്ക്കാര് അധീനതയില് പൊളിഞ്ഞു വീഴാറായി കാടുപിടിച്ച് കിടക്കുന്ന ജില്ലയിലെ പലകെട്ടിടങ്ങളും വിഷപാമ്പുകളുടെ താവളമാണ് ഇപ്പോള്. ജനങ്ങള്ക്ക് ഇത് വെട്ടി തെളിക്കുവാന് അനുമതിയില്ലാത്തതിനാല് സന്നദ്ധ സംഘടനകള്ക്ക് പോലും ഈ കാടുകള് തെളിക്കാന് സാധിക്കില്ല. വര്ഷങ്ങളായി കാട് കയറി കിടക്കുന്ന ഇത്തരം ഭൂമികള് പന്നിയും പാമ്പും വിഷ ജീവികളുമെല്ലാം കയ്യടക്കിയിട്ട് കാലങ്ങള് കഴിഞ്ഞു എന്നിട്ടും ഇത് തെളിക്കാന് മാത്രം നടപടിയില്ല. ജില്ലാ ഭരണകൂടം ഈ വിഷയത്തില് കര്ശന നിലപാട് സ്വീകരിക്കേണ്ടത് ആവശ്യമാണ്.
