തിരുവനന്തപുരം: എസ്എഫ്ഐയ്ക്കെതിരെ ഗവര്ണര് ആരിഫ് മുഹമ്മദ് ഖാന്. ഒരു പ്രത്യേക വിദ്യാര്ത്ഥി സംഘടനയുടെ ഭാഗമായാല് എന്ത് തട്ടിപ്പും നടക്കുമെന്ന് ഗവര്ണര് ആരോപിച്ചു. പാര്ട്ടിയില് മെമ്പര്ഷിപ്പ് എടുത്താല് അധ്യാപകരാകാമെന്നും ഗവര്ണര് പരിഹസിച്ചു. എസ്എഫ്ഐ മെമ്പര്ഷിപ്പ് എന്നത് നിയമവിരുദ്ധ പ്രവര്ത്തനം നടത്താനുള്ള പാസ്പോര്ട്ട് ആണെന്ന് ആരിഫ് മുഹമ്മദ് ഖാന് പറഞ്ഞു.
ഈ വിദ്യാര്ഥി സംഘടനയില് അംഗമായാല് എന്ത് നിയമ വിരുദ്ധ പ്രവര്ത്തനവും നടത്താം. ഉന്നത വിദ്യാഭ്യാസ മേഖല ഗുരുതര പ്രതിസന്ധിയിലാണെന്നും ഗവര്ണര് പറഞ്ഞു. അതേസമയം വ്യാജ ഡിഗ്രി വിവാദത്തില് നിഖില് തോമസിനെ തള്ളി സി പി എം രംഗത്തെത്തി. കോളേജ് പ്രവേശനത്തിന് പാര്ട്ടിയുടെ സഹായം തേടിയ നിഖില് തോമസ് ചെയ്തത് കൊടും ചതിയാണെന്ന് സിപിഎം കായംകുളം ഏരിയ സെക്രട്ടറി പി അരവിന്ദാക്ഷന് പറഞ്ഞു.
