തിരുവനന്തപുരം : സര്ക്കാര് ജീവനക്കാരുടെ ശമ്പളം മാറ്റിവെക്കാനുള്ള സര്ക്കാര് ഓര്ഡിനന്സിന് ഗവര്ണറുടെ അംഗീകാരം. ഓര്ഡിനന്സില് ഗവര്ണര് ഒപ്പിട്ടു. തദ്ദേശ വാര്ഡ് ഓര്ഡിനന്സിനും ഗവര്ണര് അംഗീകാരം നല്കി. ദുരന്തനിവാരണ നിയമപ്രകാരമാണ് ശമ്പളം മാറ്റിവെക്കാനുള്ള ഓര്ഡിനന്സ് സര്ക്കാര് പുറപ്പെടുവിച്ചത്.
25 ശതമാനം വരെ ശമ്പളം പിടിക്കാന് സര്ക്കാരിന് അധികാരമുണ്ട്. ജീവനക്കാര്ക്ക് ഈ മാസത്തെ ശമ്പള വിതരണം വൈകും. ഓര്ഡിനന്സ് നടപടിക്രമം തീര്ന്നിട്ടാകും ശമ്പളം വിതരണം ചെയ്യുക. ശമ്പളം തിരിച്ചു തരുന്നത് ആറ് മാസത്തിനകം തീരുമാനിച്ചാല് മതി. നേരത്തെ കൊവിഡ് പ്രതിസന്ധി പരിഹരിക്കാന് സര്ക്കാര് ജീവനക്കാരുടെ ശമ്പളം മാറ്റിവെക്കാനുള്ള സര്ക്കാര് തീരുമാനം നിയമപരമല്ലെന്ന് ഹൈക്കോടതി പറഞ്ഞിരുന്നു. ഇതിനെ മറികടക്കാന് സാലറി മാറ്റിവെക്കാന് സര്ക്കാരിനെ അധികാരപ്പെടുത്തുന്ന ഓര്ഡിനന്സാണ് മന്ത്രിസഭാ യോഗത്തില് കൊണ്ടുവന്നത്.
ഹൈക്കോടതി വിധിക്കെതിരെ സുപ്രീം കോടതിയില് അപ്പീല് നല്കില്ലെന്ന് സര്ക്കാര് നേരത്തെ അറിയിച്ചിരുന്നു. സാലറി മാറ്റിവെക്കല് നിയമപരമല്ലെന്നാണ് കോടതി പറഞ്ഞത്. അതിനാലാണ് ഓര്ഡിനന്സ് കൊണ്ടുവന്നത്. കോടതി തന്നെ സര്ക്കാരിന് വഴി തുറന്നിരിക്കുകയാണെന്നും ശമ്പളം മാറ്റിവെക്കലിന് സര്ക്കാരിനെ അധികാരപ്പെടുത്താന് നിയമം കൊണ്ടുവരുന്നതിന് കോടതി വിധി സഹായകരമായി അതിനാലാണ് ഓര്ഡിനന്സ് കൊണ്ടുവരുന്നതെന്നും ധനവകുപ്പ് പറയുന്നു. ആറുദിവസത്തെ ശമ്പളമാണ് ഓരോ മാസം പിടിക്കാന് സര്ക്കാര് തീരുമാനിച്ചത്.
The post ശമ്പളം മാറ്റിവെക്കാനുള്ള സര്ക്കാര് ഓര്ഡിനന്സിന് ഗവര്ണറുടെ അംഗീകാരം appeared first on Pathanamthitta Media.
