തിരുവനന്തപുരം: വി.സി നിയമനവുമായി ഗവര്ണര് മുന്നോട്ട്. പ്രൊഫസര്മാരുടെ പട്ടിക ആവശ്യപ്പെട്ട് ഗവര്ണര് കേരള, കാലിക്കറ്റ്, എം.ജി, കണ്ണൂര്, കുസാറ്റ് വി.സിമാര്ക്കാണ് കത്തയച്ചത്. സെനറ്റ് യോഗത്തില് നിന്നും വിട്ടുനിന്ന പതിനഞ്ച് അംഗങ്ങളെ പുറത്താക്കിയതിനു പിന്നാലെയാണ് കടുത്ത നടപടിയുമായി ഗവര്ണര് മുന്നോട്ടു പോകുന്നത്. ഒക്ടോബര് 24 നു കേരള വി.സിയുടെ കാലാവധി അവസാനിക്കാനിരിക്കെയാണ് പ്രൊഫസര്മാരുടെ പട്ടിക ആവശ്യപ്പെട്ട് ഗവര്ണര് വി.സിമാര്ക്ക് കത്ത് അയച്ചത്.
കേരള, കാലിക്കറ്റ്, എം.ജി, കണ്ണൂര്, കുസാറ്റ് വി.സിമാര്ക്കാണ് കത്തയച്ചത്. 10 വര്ഷം സര്വീസ് പൂര്ത്തിയാക്കിയവരെയാണ് വി.സിമാരായി നിയമിക്കാന് കഴിയുക. ഉടനടി പട്ടിക നല്കണമെന്നാണ് കത്തില് നിര്ദേശം നല്കിയിരിക്കുന്നത്. ഒരു വി.സിയുടെ കാലാവധി അവസാനിച്ചാല് താല്ക്കാലിക ചുമതല മറ്റു വി.സിമാര്ക്ക് നല്കാറാണ് പതിവ്. അതില് നിന്നു വ്യത്യസ്തമായാണ് വി.സിയെ നിയമിക്കാനുള്ള തീരുമാനവുമായി ഗവര്ണര് മുന്നോട്ടു പോകുന്നത്.
സെര്ച് കമ്മിറ്റിയില് സെനറ്റ് പ്രതിനിധിയെ നിര്ദേശിക്കണമെന്നു ഗവര്ണര് അന്ത്യശാസനം നല്കിയതിനെ തുടര്ന്നു സെനറ്റ് യോഗം വിളിച്ചെങ്കിലും ക്വാറം തികയാത്തതിനാല് നടന്നില്ല. യോഗത്തില് പങ്കെടുക്കാത്ത 15 അംഗങ്ങളെ പുറത്താക്കിയതിനു പിന്നാലെയാണ് പ്രൊഫസര്മാരുടെ പട്ടിക ആവശ്യപ്പെട്ട് ഗവര്ണര് കത്ത് നല്കിയത്. ഒത്തു തീര്പ്പ് വേണ്ടെന്നും കടുത്ത നടപടിയുമായി മുന്നോട്ടുപോകാനുമാണ് രാജ്ഭവന് തീരുമാനം.
