പത്തനംതിട്ട: ലഹരി വിരുദ്ധ ബോധവൽക്കരണത്തിന്റെ ഭാഗമായി വലഞ്ചുഴി പ്രദേശത്തെ മുഴുവൻ വീടുകളിലും സന്ദർശനം നടത്താൻ തീരുമാനിച്ചതായി മുൻ നഗരസഭാ ചെയർമാൻ അഡ്വ എ.സുരേഷ് കുമാർ പറഞ്ഞു. എ ഡി എസ് കമ്മറ്റിയുടെയും വിജിലന്റ് ഗ്രൂപ്പിന്റെയും നേതൃത്വത്തിൽ വലംചുഴിയിൽ നടത്തിയ ലഹരി വിരുദ്ധ ബോധവൽകരണ പരിപാടിയായ “ഇരുളിൽ നിന്നും വെളിച്ചത്തിലേക്ക് ” പദ്ധതി ഉദ്ഘാടനം ചെയ്യുകയായിരുന്നു അദ്ദേഹം.
ഭാവിതലമുറയെ കാർന്നു തിന്നുന്ന ലഹരിയുടെ പിടിയിൽ നിന്ന് മോചനം വേണമെങ്കിൽ ജനത ഒന്നടങ്കം പ്രവർത്തിക്കേണ്ട സമയമാണിതെന്നും സുരേഷ്കുമാർ പറഞ്ഞു. എ ഡി.എസ് പ്രസിഡന്റ് ഷീജ യൂസഫ് അധ്യക്ഷത വഹിച്ചു. എക്സൈസ് ഓഫീസർ എ അയൂബ് ഖാൻ പഠനക്ലാസിന് നേതൃത്വം നൽകി. മുൻ ചെയർ പേഴ്സൺ അഡ്വ ഗീത സുരേഷ്, പ്രിവന്റീവ് ഓഫീസർ ബി സുഭാഷ്,സിവിൽ ഓഫീസർ എൻ പ്രവീൺ ,കമ്യൂണിറ്റി കൗൺസിലർ രാജു എ നായർ ,എ.ഡി.എസ് സെക്രട്ടറി എം.കെ ശ്രീദേവി രഘു കാരുവേലിൽ ,യൂസഫ് വലഞ്ചുഴി ,മഹിളാ മണിയമ്മ ,ബാലസഭ പ്രസിഡന്റ് കൃഷ്ണപ്രിയ എന്നിവർ പ്രസംഗിച്ചു.
