ന്യൂഡല്ഹി : 2024 ലെ ലോക്സഭ തിരഞ്ഞെടുപ്പില് കോണ്ഗ്രസിന്റെ വിജയ സാധ്യത താന് കാണുന്നില്ലെന്ന് മുതിര്ന്ന കോണ്ഗ്രസ് നേതാവും ജമ്മു കശ്മീര് മുന് മുഖ്യമന്ത്രിയുമായ ഗുലാം നബി ആസാദ്. ജമ്മു കശ്മീരില് ആര്ട്ടിക്കിള് 370 റദ്ദാക്കിയതിനെ കുറിച്ച് സംസാരിക്കുകയായിരുന്നു അദ്ദേഹം. പൂഞ്ചില് നടന്ന റാലിയിലാണ് കോണ്ഗ്രസിന്റെ ആത്മവിശ്വാസം തല്ലിക്കെടുത്തുന്ന ഗുലാം നബി ആസാദിന്റെ വാക്കുകള്.
‘കശ്മീരിന്റെ പ്രത്യേക പദവി പുനഃസ്ഥാപിക്കാന് സുപ്രീംകോടതിക്കോ കേന്ദ്രസര്ക്കാരിനോ മാത്രമേ കഴിയൂ. നിലവിലുള്ള കേന്ദ്രസര്ക്കാര് അത് റദ്ദാക്കി. അതുകൊണ്ട് പുതിയൊരു സര്ക്കാര് വരേണ്ടി വരും. പക്ഷേ 2024 ലും കോണ്ഗ്രസ് 300 സീറ്റുകള് നേടുമെന്ന് എനിക്ക് യാതൊരു ഉറപ്പുമില്ല. 300 സീറ്റുകള് നേടണമെന്ന് ഞാന് ആഗ്രഹിക്കുന്നുണ്ട്. എന്നാല് അതിനുള്ള യാതൊരു സാധ്യതയും ഇപ്പോള് കാണുന്നില്ല’ ഗുലാം നബി ആസാദ് പറഞ്ഞു. അതേസമയം, രാഷ്ട്രീയപരമായ കാര്യങ്ങളിലേക്ക് ഇപ്പോള് പോകേണ്ടതില്ലെന്നും അദ്ദേഹം പറഞ്ഞു. എല്ലാ രാഷ്ട്രീയപാര്ട്ടികളും മറുപക്ഷത്തുള്ളവരെ അധിക്ഷേപിച്ച് സംസാരിക്കുന്നതിന് പകരം പ്രവര്ത്തിച്ച് കാണിക്കണമെന്നാണ് ഞാന് ആഗ്രഹിക്കുന്നതെന്നും അദ്ദേഹം പറഞ്ഞു. ജനങ്ങള്ക്ക് വിശ്വാസം ഉണ്ടാകുന്ന രീതിയില് അവര്ക്ക് പ്രവര്ത്തിക്കാനാകണമെന്നും അദ്ദേഹം വ്യക്തമാക്കി.
