കുവൈത്ത് സിറ്റി: വിശുദ്ധ ഹജ്ജ് കർമ്മത്തിനായി പുറപ്പെടുന്ന തീർഥാടകരുടെ യാത്ര സുഗമവും സുരക്ഷിതവുമാക്കുന്നതിനായി കുവൈത്ത് അന്താരാഷ്ട്ര വിമാനത്താവളത്തിൽ കസ്റ്റംസ് ജനറൽ അഡ്മിനിസ്ട്രേഷൻ കർശന പരിശോധന നടത്തി.. വിമാനത്താവളത്തിലെ ടി4 യാത്രാ ടെർമിനലിൽ ഒരുക്കിയ സജ്ജീകരണങ്ങൾ ഉന്നത ഉദ്യോഗസ്ഥർ നേരിട്ടെത്തി വിലയിരുത്തി. തീർഥാടകരുടെ യാത്രാ നടപടികൾ വേഗത്തിലാക്കാനും സുരക്ഷ ഉറപ്പാക്കാനുമായി വിപുലമായ സൗകര്യങ്ങളാണ് വിമാനത്താവളത്തിൽ ഒരുക്കിയിരിക്കുന്നത്. യൂസഫ് ഖാലിദ് അൽ നുവൈഫ്, സാലിഹ് മുഹമ്മദ് അൽ ഒമർ എന്നിവരടങ്ങുന്ന ഉന്നത ഉദ്യോഗസ്ഥ സംഘമാണ് പരിശോധനയ്ക്ക് നേതൃത്വം നൽകിയത്.
യാത്രക്കാരുടെ പരിശോധനാ സംവിധാനങ്ങൾ, കസ്റ്റംസ് ക്ലിയറൻസ്, വിവിധ സുരക്ഷാ ഏജൻസികളുടെ ഏകോപനം എന്നിവ സംഘം വിലയിരുത്തി. സുരക്ഷാ മുൻകരുതലുകളിൽ വിട്ടുവീഴ്ച ചെയ്യാതെ തന്നെ തീർഥാടകരുടെ തിരക്ക് നിയന്ത്രിക്കുന്നതിൽ കസ്റ്റംസ് ജീവനക്കാർ നടത്തുന്ന പ്രവർത്തനങ്ങളെ അധികൃതർ പ്രശംസിച്ചു. ഹജ്ജ് സീസൺ പ്രമാണിച്ച് കുവൈത്തിലെ എല്ലാ പ്രവേശന കവാടങ്ങളിലും കൂടുതൽ ഉദ്യോഗസ്ഥരെയും ആധുനിക സാങ്കേതിക സംവിധാനങ്ങളെയും വിന്യസിച്ചിട്ടുണ്ട്. തീർഥാടകർക്ക് തടസ്സമില്ലാത്ത യാത്ര ഉറപ്പാക്കാൻ വിമാനത്താവളത്തിലെ എല്ലാ വകുപ്പുകളും ഏകോപിതമായി പ്രവർത്തിക്കണമെന്ന് പരിശോധനയ്ക്ക് ശേഷം ഉദ്യോഗസ്ഥർ നിർദ്ദേശം നൽകി.
