ന്യൂഡൽഹി: സിബിഎസ്ഇ പരീക്ഷകളുടെ പുനർമൂല്യനിർണ്ണയത്തിനായുള്ള അപേക്ഷാ തീയതിയിൽ മാറ്റം വരുത്തി. സാങ്കേതിക തടസ്സങ്ങൾ കാരണം അപേക്ഷ സ്വീകരിക്കുന്ന തീയതി ജൂൺ ഒന്നിലേക്ക് മാറ്റിയതായി സിബിഎസ്ഇ അധികൃതർ അറിയിച്ചു. നേരത്തെ മെയ് 26 മുതൽ 29 വരെയായിരുന്നു അപേക്ഷകൾ സ്വീകരിക്കാൻ നിശ്ചയിച്ചിരുന്നത്. ജൂൺ ഒന്ന് മുതൽ ഔദ്യോഗിക വെബ്സൈറ്റിലൂടെ അപേക്ഷാ നടപടികൾ ആരംഭിക്കും.
അതേസമയം പരീക്ഷാ നടത്തിപ്പിൽ വീഴ്ച വരുത്തിയതിന് കോംപ്റ്റ് കമ്പനിക്ക് പിഴ ചുമത്താൻ സിബിഎസ്ഇ തീരുമാനിച്ചു. ഒഎസ്എം സംവിധാനം നടപ്പിലാക്കുന്നതിൽ കമ്പനിക്ക് ഗുരുതരമായ വീഴ്ച സംഭവിച്ചതായി കണ്ടെത്തിയതിനെത്തുടർന്നാണ് നടപടി. ഈ വീഴ്ച കേന്ദ്രമന്ത്രി തന്നെ സമ്മതിച്ചതോടെ, വിദ്യാർത്ഥികൾ തങ്ങൾക്ക് അർഹമായ ഗ്രേസ് മാർക്ക് ലഭിക്കണമെന്ന ആവശ്യം ശക്തമാക്കിയിരിക്കുകയാണ്.
