തലശ്ശേരി : പുന്നോലില് കൊല്ലപ്പെട്ട സിപിഎം പ്രവര്ത്തകന് ഹരിദാസന്റെ മരണകാരണം അമിത രക്തസ്രാവമെന്നാണ് പോസ്റ്റ്മോര്ട്ടം റിപ്പോര്ട്ട്. വലതുകാലിലും തുടയ്ക്കും മാരകമായ നാല് വെട്ടുകള് എറ്റുവെന്നും റിപ്പോര്ട്ടില് പറയുന്നു. അതിനിടെ, ഹരിദാസനെ വെട്ടിക്കൊന്ന കേസില് ബിജെപി കൗണ്സിലര് ലിജേഷ് ഉള്പ്പെടെ നാല് ആര്എസ്എസുകാര് അറസ്റ്റിലായി. ഇവര്ക്കെതിരെ ഗൂഢാലോചനക്കുറ്റം ചുമത്തി. ഇവര് ഉള്പ്പടെ ഏഴുപേരെയാണ് പോലീസ് കസ്റ്റഡിയിലെടുത്തത്. കണ്ണൂരില് നടന്നത് അതിക്രൂരമായ കൊലപാതകമെന്ന് മുഖ്യമന്ത്രി പിണറായി വിജയന് നിയമസഭയില് പറഞ്ഞു. കണ്ണൂരിനെ കലാപ ഭൂമിയാക്കാനാണ് ചിലരുടെ ശ്രമമെന്നും മുഖ്യമന്ത്രി പറഞ്ഞു.
ഇന്നലെ പുലര്ച്ചെ രണ്ട് മണിയോടെയാണ് മത്സ്യതൊഴിലാളിയായ ഹരിദാസിനെ വെട്ടിക്കൊലപ്പെടുത്തിയത്. തലശ്ശേരി ന്യൂമാഹിക്കടുത്ത് പുന്നോലിലായിരുന്നു സംഭവം. വീടിന് സമീപത്ത് വെച്ചാണ് ഹരിദാസിന് വെട്ടേറ്റത്. ജോലി കഴിഞ്ഞ് മടങ്ങിയെത്തിയ ഹരിദാസന് അടുക്കള ഭാഗത്തെത്തി മീന് ഭാര്യ മിനിയെ ഏല്പ്പിച്ച ശേഷം മുന്ഭാഗത്തേക്കു പോകുന്നതിനിടെ അക്രമികള് ചാടി വീഴുകയായിരുന്നു. ബഹളം കേട്ട് ബന്ധുക്കളും സ്ഥലത്തെത്തിയിരുന്നു. ബന്ധുക്കളുടെ മുന്നില് വെച്ചാണ് അക്രമം നടന്നത്. രണ്ട് ബൈക്കുകളിലായി എത്തിയ അക്രമി സംഘമാണ് കൊല നടത്തിയത്. ഹരിദാസനു നേരെയുള്ള അക്രമം തടയാന് ശ്രമിക്കുന്നതിനിടെ സഹോധരന് സുരനും വെട്ടേറ്റിരുന്നു. ഇരുപതിലേറെ വെട്ടാണ് ഹരിദാസിന്റെ ശരീരത്തിലുണ്ടായിരുന്നത്. ഇടതുകാല് അറുത്തു വലിച്ചെറിഞ്ഞ നിലയിലായിരുന്നു.
