കൊച്ചി : ഓണ്ലൈന് അവതാരകയോട് മോശമായിപ്പെരുമാറിയ സംഭവത്തില് നടന് ശ്രീനാഥ് ഭാസി നിര്മ്മാതാക്കളുടെ സംഘടനയുടെ വിലക്ക് നേരിടുകയാണ്. നടന് മാപ്പ് പറയുകയും പരാതിക്കാരി പരാതി പിന്വലിക്കുകയും ചെയ്തെങ്കിലും വിലക്ക് ചെറിയൊരു കാലയളവിലേക്ക് തുടരുമെന്നാണ് നിര്മ്മാതാക്കളുടെ സംഘടന പറയുന്നത്. ഇക്കാര്യത്തില് നടന് മമ്മൂട്ടിയുടെ പ്രതികരണവും ശ്രദ്ധേയമായിരുന്നു. ആരുടെയും അന്നം മുട്ടിക്കുന്ന നടപടി ശരിയല്ലെന്നായിരുന്നു മമ്മൂട്ടിയുടെ പ്രതികരണം.
സംഭവത്തില് നിര്മ്മാതാക്കള്ക്ക് പിന്തുണയുമായി എത്തിയിരിക്കുകയാണ് നടന് ഹരീഷ് പേരടി. ഷൂട്ടിംഗിന് വേണ്ടി അഡ്വാന്സ് വാങ്ങി കരാര് ഒപ്പിട്ടിട്ട് രാവിലെ എത്തേണ്ട നായക നടന് ഉച്ചക്ക് ഒരു മണിക്ക് എത്തിയാല് ഒരു ദിവസവും രണ്ട് ദിവസവും സഹിക്കും…നിരന്തരമായി ആവര്ത്തിച്ചാല് ചെറിയ ബഡ്ജറ്റില് ലോകോത്തര സിനിമകളുണ്ടാക്കുന്ന ഈ കുഞ്ഞു മലയാളത്തിന് അത് സഹിക്കാവുന്നതിന്റെയും അപ്പുറമാണെന്ന് ഹരീഷ് പറയുന്നു.
