ന്യൂഡല്ഹി: കോണ്ഗ്രസില് തെരഞ്ഞെടുപ്പ് വേണമെന്ന് നേരത്തേ പറഞ്ഞുകൊണ്ടിരുന്ന തിരുത്തല്വാദികള് ഇപ്പോള് ചുവടുമാറ്റി സമവായത്തെക്കുറിച്ച് സംസാരിക്കുന്നതിനെ ചോദ്യം ചെയ്ത് ശശി തരൂര് എം.പി. ഏതായാലും താന് മത്സരിക്കും. പാര്ട്ടി അധ്യക്ഷ സോണിയ ഗാന്ധിക്ക് ജി23 എഴുതിയ കത്തില് ഉറച്ചുനില്ക്കുന്നു -തരൂര് പറഞ്ഞു. ജി23 ഒരു സംഘടനയല്ല. സോണിയ ഗാന്ധിക്ക് 100 പേരുടെ പിന്തുണയോടെ കത്തയക്കാനാണ് തീരുമാനിച്ചിരുന്നത്.
കോവിഡ് സാഹചര്യങ്ങളില് കഴിഞ്ഞില്ല. അങ്ങനെയാണ് 23 പേര് ഒപ്പിട്ട കത്തയച്ചത്. അതിലെ പ്രധാനികളില് മൂന്നു പേര് പാര്ട്ടി വിട്ടു. താന് ഒരിക്കലും ജി23 പ്രതിനിധിയല്ല, അതിന് ആഗ്രഹിച്ചിട്ടുമില്ല. അവരുടെ ചിന്താഗതിയെ പിന്തുണച്ചു. പാര്ട്ടിയില് തെരഞ്ഞെടുപ്പ് നടക്കണമെന്നായിരുന്നു ഒരു നിലപാട്. പ്രസിഡന്റ് സ്ഥാനത്തേക്ക് ഇപ്പോള് മത്സരിക്കുന്നു. പ്രവര്ത്തക സമിതിയിലേക്കും തെരഞ്ഞെടുപ്പ് നടക്കണം. എന്നാല് തെരഞ്ഞെടുപ്പ് ആവശ്യപ്പെട്ടവര് പൊതുസമവായം മതി, തെരഞ്ഞെടുപ്പ് വേണ്ടെന്ന് ഇപ്പോള് പറയുന്നു. എന്തുകൊണ്ടാണ് ചിന്താഗതി മാറിയതെന്ന് അറിയില്ല. കോണ്ഗ്രസില് തന്നെയാണ് എല്ലാവരും. അതുകൊണ്ട് അവരുടെ പിന്മാറ്റം നിരാശപ്പെടുത്തുന്നില്ല. 60 പേര് ഒപ്പിട്ട് തന്നെ പിന്തുണക്കുന്ന തെരഞ്ഞെടുപ്പില് നിന്ന് പിന്മാറുന്ന പ്രശ്നമില്ല. മല്ലികാര്ജുന് ഖാര്ഗെയുടെ പത്രികയില് ഒപ്പുവെച്ച വലിയ പേരുകള് ഇക്കൂട്ടത്തില് ഇല്ലായിരിക്കാം. പക്ഷേ, അവര് എന്നില് അര്പ്പിച്ച വിശ്വാസത്തോട് വഞ്ചന കാണിക്കില്ല. ഖാര്ഗെക്കും തനിക്കും രണ്ടു ചിന്താധാരകളാണ്.
