കൊച്ചി : സംസ്ഥാന കാര്ഷിക വികസന ബാങ്കിന്റെ പൊതുയോഗം വിളിച്ചു ചേര്ത്ത് അവിശ്വാസ പ്രമേയത്തിന് അനുമതി നല്കിയ സഹകരണ സംഘം രജിസ്ട്രാറുടെ നടപടി ഹൈക്കോടതി ശരിവെച്ചു. ഇതിനെതിരെ ബോര്ഡംഗമായ മുന് എം.എല്.എ. ശിവദാസന് നായരുള്പ്പെടെ നല്കിയ ഹര്ജി ജസ്റ്റിസ് സതീഷ് നൈനാന്റെ ബെഞ്ച് തള്ളി. പൊതുയോഗം വിളിച്ചത് നിയമാനുസൃതമാണെന്ന് സിംഗിള്ബെഞ്ച് വ്യക്തമാക്കി.
പൊതുയോഗത്തിന് അവിശ്വാസ പ്രമേയം പരിഗണിക്കാന് അധികാരമുണ്ട്. നേരത്തെ ചേര്ന്ന പൊതുയോഗത്തില് ഭൂരിപക്ഷം അംഗങ്ങളും ബഡ്ജറ്റിനെതിരെ വോട്ട് രേഖപ്പെടുത്തിയതിനെത്തുടര്ന്ന് ബാങ്ക് പ്രസിഡന്റ് സോളമന് അലക്സ് രാജിവെച്ചിരുന്നു. തുടര്ന്ന് ഭൂരിപക്ഷം അംഗങ്ങള് ആവശ്യം ഉന്നയിച്ചതിനെത്തുടര്ന്നാണ് രജിസ്ട്രാര് പി.ബി.നൂഹ് പ്രത്യേക പൊതുയോഗം വിളിച്ചു ചേര്ത്തത്.
