കൊച്ചി: കെഎസ്ആര്ടിസി ജീവനക്കാര്ക്ക് സപ്ലൈകോ അടക്കമുള്ള സ്ഥാപനങ്ങളുടെ കൂപ്പണുകള് നല്കാനാകുമോ എന്ന് സര്ക്കാരിനോട് ഹൈക്കോടതി. ശമ്പള കുടിശ്ശികയ്ക്ക് പകരം സംവിധാനം എന്ന നിലയിലാണ് കോടതി ഇക്കാര്യം ആരാഞ്ഞത്. കെഎസ്ആര്ടിസിക്ക് 103 കോടി രൂപ നല്കണമെന്ന സിംഗിള് ബെഞ്ച് വിധിക്കെതിരെ നല്കിയ അപ്പീലിലാണ് ഹൈക്കോടതി ഈ നിര്ദേശം വച്ചത്.
എന്നാല് കൂപ്പണുകള് നല്കാമെന്ന നിര്ദേശത്തെ ജീവനക്കാര് എതിര്ത്തു. കുടിശ്ശികയുള്ള ശമ്പളത്തിന് പകരം കൂപ്പണുകള് ആവശ്യമില്ലെന്ന് ജീവനക്കാര് വ്യക്തമാക്കി. അതിനിടെ കെഎസ്ആര്ടിസി ജീവനക്കാര്ക്ക് ശമ്പളവിതരണത്തിന് 50 കോടി രൂപ നല്കാമെന്ന് സര്ക്കാര് ഹൈക്കോടതിയില്. ഈ തുക കൊണ്ട് കുടിശ്ശിക ശമ്പളത്തിന്റെ മൂന്നിലൊന്ന് നല്കണമെന്നും കോടതി നിര്ദേശിച്ചു. സിംഗിള്ബഞ്ച് വിധിക്കെതിരെ സര്ക്കാര് നല്കിയ അപ്പീല് വിധി പറയാനായി മാറ്റി.
ശമ്പള വിതരണത്തിന് സര്ക്കാര് ധനസഹായം അനുവദിക്കണമെന്ന ഹൈക്കോടതി സിംഗിള് ബെഞ്ച് ഉത്തരവ് ഡിവിഷന് ബെഞ്ച് സ്റ്റേ ചെയ്തിരുന്നു. ശമ്പളം നല്കാന് ബാധ്യതയില്ലെന്ന് വ്യക്തമാക്കി സര്ക്കാര് നല്കിയ അപ്പീലിലാണ് ഡിവിഷന് ബെഞ്ചിന്റെ ഇടക്കാലനിര്ദേശം. ശമ്പളം മുടങ്ങാതെ നല്കണമെന്ന ജീവനക്കാരുടെ ഹര്ജിയില് പുറപ്പെടുവിച്ച ഉത്തരവാണ് ഡിവിഷന് ബെഞ്ച് സ്റ്റേ ചെയ്തിരിക്കുന്നത്.
കെഎസ്ആര്ടിസി ജീവനക്കാരുടെ ശമ്പളവിതരണത്തിന് 103 കോടി രൂപ അനുവദിക്കണമെന്നും ഓണത്തിനുമുമ്പ് ഇതിനായി നടപടിയെടുക്കണമെന്നുമാണ് ഹൈക്കോടതി സിംഗിള് ബെഞ്ച് ഉത്തരവിട്ടിരുന്നു. കെഎസ്ആര്ടിസി സര്ക്കാരിന്റെ മറ്റ് കോര്പറേഷനുകളെപ്പോലെ ഒരു കോര്പറേഷന് മാത്രമാണ്, അതിലെ ജീവനക്കാര്ക്ക് ശമ്പളം നല്കാന് ബാധ്യതയില്ലെന്നാണ് സര്ക്കാരിന്റെ വാദം.
