കൊച്ചി: ലോക്ഡൗണ് മൂലം അസമിലും ബംഗാളിലും കുടുങ്ങിയ വാഹനങ്ങള് തിരികെ എത്തിക്കാന് ആര്.ടി.ഒ ഓഫിസില് ഹെല്പ് ഡെസ്ക് തുടങ്ങിയെന്ന് ആര്.ടി.ഒ പി.എം. ഷബീര് അറിയിച്ചു. യാത്രക്കാരുമായി പോയ ഏതാണ്ട് 170ഓളം കോണ്ട്രാക്ട് കാര്യേജ് വാഹനങ്ങള് ഇങ്ങനെ കുടുങ്ങിയെന്നാണ് മോട്ടോര് വാഹന വകുപ്പ് അന്വേഷണത്തില് കണ്ടെത്തിയത്.
ഈ വാഹനങ്ങളുടെ ഡ്രൈവര്മാരെ ഫോണില് വിളിച്ച് തിരക്കിയതില് തിരികെ വരാന് ആഗ്രഹിക്കുന്ന വാഹനങ്ങളില് സ്പെഷല് പെര്മിറ്റ് കാലാവധി കഴിഞ്ഞവയുണ്ട്. അതിനാല് വാഹനങ്ങളുടെ പെര്മിറ്റ് ഓണ്ലൈനായി പുതുക്കാന് സൗകര്യം ഒരുക്കി. അപേക്ഷ ലഭിച്ചാല് ഉടന് പെര്മിറ്റ് നല്കാന് സംവിധാനവും ഏര്പ്പെടുത്തി.
ഇതുവരെ ലഭിച്ച 32 അപേക്ഷക്കും പെര്മിറ്റ് നല്കി. അപേക്ഷ സമര്പ്പിക്കേണ്ടതും ഫീസ് അടക്കേണ്ടതും ഓണ്ലൈന് വഴിയാണ്. അതേസമയം ലോക്ഡൗണ് തീരുന്ന മുറക്ക് യാത്രക്കാരുമായി പുറപ്പെട്ടാല് മതിയെന്ന് തീരുമാനിച്ചവരുമുണ്ട്. ജില്ല ഹെല്പ്പ് ഡെസ്കുകളുടെ പ്രവര്ത്തനം അഡീഷനല് ട്രാന്സ്പോര്ട്ട് കമ്മീഷണര് നേരിട്ട് വിലയിരുത്തുമെന്നും അദ്ദേഹം അറിയിച്ചു.
