കോട്ടയം: കേരളത്തിൽ എയിംസ് സ്ഥാപിക്കാനുള്ള ചർച്ചകൾ വീണ്ടും സജീവമാകുന്നതിനിടെ, കോട്ടയം ജില്ലയിലെ വെള്ളൂർ ന്യൂസ്പ്രിന്റ് ഫാക്ടറിയുടെ 700 ഏക്കർ ഭൂമിയും പരിഗണനയിലാണെന്ന് ആരോഗ്യമന്ത്രി കെ. മുരളീധരൻ. കേന്ദ്രസർക്കാരിന്റെ ശ്രദ്ധയിൽ ഇക്കാര്യം എത്തിക്കുമെന്നും മന്ത്രി വ്യക്തമാക്കി. കായകല്പ്പം ജനസമ്പർക്ക പരിപാടിയിൽ സംസാരിക്കവെയാണ് ജില്ലയിലെ ആരോഗ്യരംഗവുമായി ബന്ധപ്പെട്ട വിവിധ വികസന പദ്ധതികളും മന്ത്രി പ്രഖ്യാപിച്ചത്.
സ്വന്തം നിയോജക മണ്ഡലത്തിലെ ആരോഗ്യ മേഖലയുമായി ബന്ധപ്പെട്ട പ്രശ്നങ്ങള് ജനപ്രതിനിധികള് നേരിട്ടും നിവേദനങ്ങളിലൂടെയും മന്ത്രിയെ അറിയിക്കുന്നതിന് പകരം വകുപ്പ് നേരിട്ട് ജനപ്രതിനിധികളുടെ പക്കലേക്ക് എത്തുന്ന സംവിധാനമാണ് കായകല്പ്പം. ഈ പരിപാടിയുടെ ഭാഗമായി വൈക്കം എം.എൽ.എ കെ. ബിനിമോൻ വെള്ളൂരിൽ ലഭ്യമായ 700 ഏക്കർ ഭൂമിയെക്കുറിച്ച് മന്ത്രിയുടെ ശ്രദ്ധയിൽപ്പെടുത്തിയിരുന്നു. കോട്ടയം മെഡിക്കൽ കോളജിന്റെ കൈവശമുള്ള സ്ഥലവും എയിംസിനായി പരിഗണിക്കാമെന്നും, സംസ്ഥാനത്തിന് എയിംസ് ലഭിക്കുകയെന്നതാണ് സർക്കാരിന്റെ പ്രധാന ലക്ഷ്യമെന്നും മന്ത്രി പറഞ്ഞു.
