ബെർലിൻ: തുടർച്ചയായ ഉഷ്ണതരംഗങ്ങൾ യൂറോപ്പിൽ വലിയ ദുരന്തമായി മാറുന്നു. ഈ വേനൽക്കാലത്ത് ജർമനിയിൽ മാത്രം ചൂടുമായി ബന്ധപ്പെട്ട് 15,800 പേർ മരിച്ചതായാണ് കണക്കുകൾ. ജൂൺ അവസാനത്തെ ഒരാഴ്ചയിൽ മാത്രം 9,600 മരണങ്ങളാണ് റിപ്പോർട്ട് ചെയ്തത്. ഈ സമയത്ത് രാജ്യത്തിന്റെ പല ഭാഗങ്ങളിലും പകൽ താപനില 40 ഡിഗ്രി സെൽഷ്യസിലെത്തി. ജൂലൈ അവസാനം മുതൽ ഓഗസ്റ്റ് മധ്യം വരെയുള്ള കാലയളവിൽ 4,000 ചൂട് സംബന്ധമായ മരണങ്ങളും കൂടി റിപ്പോർട്ട് ചെയ്തു. 46 കാലാവസ്ഥാ സ്റ്റേഷനുകളിൽ താപനില 40 ഡിഗ്രി സെൽഷ്യസിന് മുകളിലെത്തുകയും ചെയ്തു.മെയ് മുതൽ പടിഞ്ഞാറൻ യൂറോപ്പിൽ തുടർച്ചയായി നാല് റെക്കോർഡ് ഉഷ്ണതരംഗങ്ങളാണ് ഉണ്ടായത്. ജർമനിക്ക് പുറമെ ഫ്രാൻസിലും സ്പെയിനിലും സ്ഥിതി ഗുരുതരമായിരുന്നു. ഫ്രാൻസിൽ 4,500ലേറെ പേരും സ്പെയിനിൽ ഏകദേശം 5,000 പേരും ഈ വേനൽക്കാലത്ത് ചൂടുമായി ബന്ധപ്പെട്ട് മരിച്ചതായാണ് കണക്കുകൾ.
ഫ്രാൻസിൽ രാജ്യത്തിന്റെ ശരാശരി പകൽ താപനിലയിൽ തന്നെ റെക്കോർഡ് ചൂട് രേഖപ്പെടുത്തിയപ്പോൾ, സ്പെയിനിൽ പല പ്രദേശങ്ങളിലും 42 ഡിഗ്രി സെൽഷ്യസിന് മുകളിലുള്ള താപനില തുടർച്ചയായി അനുഭവപ്പെട്ടു.
ജർമനിയിൽ ഇതിന് മുമ്പ് ഏറ്റവും ഉയർന്ന ചൂട് സംബന്ധമായ മരണങ്ങൾ രേഖപ്പെടുത്തിയത് 2018ലായിരുന്നു. അന്ന് 8,900 പേരാണ് മരിച്ചത്. ഇത്തവണത്തെ കണക്ക് അതിനേക്കാൾ വളരെ കൂടുതലാണ്. 2008 മുതൽ ലഭ്യമായ യൂറോപ്യൻ യൂണിയൻ അധികമരണ കണക്കുകൾ പ്രകാരം, 2022 ജൂലൈയിലായിരുന്നു ഇതിന് പുറമെ മറ്റൊരു വേനൽക്കാല ആഴ്ചയിൽ മാത്രം ഇതിലും ഉയർന്ന അധികമരണനിരക്ക് രേഖപ്പെടുത്തിയിരുന്നത്. അന്ന് കോവിഡ് വ്യാപനവും തുടരുന്നുണ്ടായിരുന്നു.
അമിതമായ ചൂട് ഹീറ്റ് സ്ട്രോക്കിലേക്ക് നയിക്കുകയും ഗുരുതരമായാൽ മരണത്തിനും കാരണമാകുകയും ചെയ്യാം. ഹൃദയം, ശ്വാസകോശം, വൃക്ക തുടങ്ങിയ അവയവങ്ങളുമായി ബന്ധപ്പെട്ട നിലവിലുള്ള രോഗങ്ങളുള്ളവരിലാണ് ചൂടിന്റെ ആഘാതം കൂടുതൽ ഗുരുതരമാകുന്നത്. തുടർച്ചയായി ഉയരുന്ന താപനിലയും റെക്കോർഡ് ഉഷ്ണതരംഗങ്ങളും യൂറോപ്പിൽ ചൂട് ഇനി കാലാവസ്ഥാ പ്രശ്നം മാത്രമല്ല, വലിയ പൊതുജനാരോഗ്യ വെല്ലുവിളിയാണെന്നും വ്യക്തമാക്കുന്നു.
