ആലപ്പുഴ : വെള്ളം കയറി ആലപ്പുഴ -ചങ്ങനാശേരി, അമ്പലപ്പുഴ – തിരുവല്ല, എടത്വ – ഹരിപ്പാട് പാതകളില് ഗതാഗതം നിലച്ചു. കെഎസ്ആര്ടിസി സര്വീസുകള് നിര്ത്തി. അമ്പലപ്പുഴ – തിരുവല്ല റൂട്ടുകളില് ബസ് ഇല്ലാത്തതിനാല് ആലപ്പുഴ ഡിപ്പോയില് നിന്ന് മുഹമ്മ – കുമരകം വഴി കോട്ടയത്തേക്ക് വൈകിട്ടോടെ ഒമ്പത് അധിക സര്വീസുകള് തുടങ്ങി.
പമ്പാനദി കരകവിഞ്ഞ് – അമ്പലപ്പുഴ – തിരുവല്ല പാതയില് നെടുമ്പ്രത്തും ചക്കുളത്തുകാവിലും വെള്ളംകയറി. റോഡരിലെ വീടുകളിലും വെള്ളം കയറി. നെടുമ്പ്രത്താണ് വെള്ളം കൂടുതലുള്ളത്. റോഡിന്റെ ഒരുഭാഗത്ത് താഴ്ചയായതിനാല് വാഹനങ്ങള്ക്ക് കടന്നുപോകാന് സാധിക്കില്ല. വെള്ളം ഇനിയും കൂടിയാല് വാഹനഗതാഗതം പൂര്ണമായും നിരോധിക്കേണ്ടിവരും. എടത്വ – ഹരിപ്പാട് റൂട്ടിലും വെള്ളംകയറി കെഎസ്ആര്ടിസി സര്വീസുകള് നിര്ത്തി. എടത്വ ഭാഗത്തുനിന്നുള്ള ബസുകള് ചക്കുളത്തുകാവ് ജങ്ഷന്വരെയും ഹരിപ്പാട് ഡിപ്പോയില്നിന്നും വീയപുരം വരെയും സര്വീസ് നടത്തുന്നുണ്ട്.
എസി റോഡില് കിഴക്കന് വെള്ളത്തിന്റെ വരവില് 11 ഇടങ്ങളിലാണ് വെള്ളംകയറിയത്. ഒന്നാങ്കര, പള്ളിക്കൂട്ടുമ്മ, മാമ്പുഴക്കരി, മുട്ടാര് ജങ്ഷന്, കിടങ്ങറ, പാറക്കല് കലുങ്ക്, മനക്കച്ചിറ തുടങ്ങിയ സ്ഥലങ്ങളിലാണ് ഗതാഗത തടസമുള്ളത്. പലയിടത്തും ഒരുകിലോമീറ്റര് ദൂരത്തിലാണ് വെള്ളം. താല്ക്കാലിക പാത ഒരുക്കിയ മാമ്പുഴക്കരിഭാഗത്തും വെള്ളത്തിന്റെ ഒഴുക്ക് ശക്തമാണ്. വെള്ളം കയറിയ താല്ക്കാലിക പാതയിലുടെ വലിയ വാഹനങ്ങളടക്കം ഓടിയാല് ബലക്ഷയമുണ്ടാകുമെന്ന് ആശങ്കയുണ്ട്. പള്ളിക്കൂട്ടുമ്മ പമ്പ് ഹൗസിനുസമീപം റോഡില് വലിയ കുഴികള് രൂപപ്പെട്ടത് ഇരുചക്ര വാഹനയാത്രക്കാരെ വലച്ചു. ഒഴുകിയെത്തുന്ന വെള്ളത്തിന്റെ അളവ് വര്ധിച്ചതിനാല് ആലപ്പുഴ – ചങ്ങനാശേരി റോഡില് രാത്രി ഒമ്പത് മുതല് രാവിലെ ആറുവരെ രാത്രികാല യാത്രാനിരോധനമുണ്ട്. ഇത് വരുംദിവസങ്ങളിലും തുടരും.
