ദുബായ്: ദിവസങ്ങളായി അനുഭവപ്പെട്ട കനത്ത ചൂടിനിടെ യുഎഇയിൽ കുളിർമഴ. മസാഫി മേഖലയിൽ ശക്തമായ മഴയ്ക്കൊപ്പം ആലിപ്പഴ വർഷവും അനുഭവപ്പെട്ടതോടെ ചൂടിൽ വലഞ്ഞിരുന്ന ജനങ്ങൾക്ക് ആശ്വാസമായി. മഴയെ വരവേറ്റ നാട്ടുകാരും പ്രവാസികളും റോഡരികിലും തുറസായ സ്ഥലങ്ങളിലും ഇറങ്ങി മഴ ആസ്വദിച്ച കാഴ്ചകളും ശ്രദ്ധേയമായി. മസാഫിയിൽ ശക്തമായ മഴയും ആലിപ്പഴ വർഷവും അനുഭവപ്പെട്ടതിനെ തുടർന്ന് വാഹനമോടിക്കുന്നവർ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. മഴയെത്തുടർന്ന് റോഡുകളിൽ വെള്ളക്കെട്ട് രൂപപ്പെടാൻ സാധ്യതയുള്ളതിനാൽ അത്തരം പ്രദേശങ്ങൾ ഒഴിവാക്കണമെന്നും ബന്ധപ്പെട്ട വകുപ്പുകൾ നിർദേശിച്ചു.
അപ്രതീക്ഷിതമായി എത്തിയ മഴയെ ആഘോഷമാക്കി മാറ്റുകയായിരുന്നു യുഎഇയിലെ സ്വദേശികളും വിദേശികളും. നിരവധി പേർ വാഹനങ്ങളിൽ നിന്ന് പുറത്തിറങ്ങി മഴ നനഞ്ഞ് ആസ്വദിക്കുകയും കുടുംബസമേതം തുള്ളിച്ചാടി സന്തോഷം പങ്കിടുകയും ചെയ്തു. മഴയുടെ ചിത്രങ്ങളും വീഡിയോകളും സമൂഹമാധ്യമങ്ങളിലും വ്യാപകമായി പ്രചരിക്കുകയാണ്.
