റാന്നി : കനത്ത മഴയ്ക്കൊപ്പം എത്തിയ കൊടുങ്കാറ്റില് താലൂക്കില് വ്യാപക നാശനഷ്ടം. മരങ്ങള് കടപുഴകി വീണും വൈദ്യുതി തൂണുകള് ഒടിഞ്ഞും ബോര്ഡുകള് ഇളകിവീണും വലിയ നാശനഷ്ടങ്ങളാണ് സംഭവിച്ചത്. വൈദ്യുതി വിതരണം പൂര്ണ്ണമായും നിലച്ചു. വൈകീട്ട് അഞ്ചു മണിയോടെ തുടങ്ങിയ മഴയിലാണ് അതിശക്തമായ കാറ്റുണ്ടായത്. ഇട്ടിയപ്പാറ സ്വകാര്യ ബസ് സ്റ്റാന്ഡില് നിന്ന കൂറ്റന് ആല്മരം കടപുഴകി വ്യാപാരസമുച്ചയത്തിലെ സ്ഥാപനങ്ങളുടെ മുകളില് വീണു. മൂന്നു വ്യാപാര സ്ഥാപനങ്ങള് പാടെ തകര്ന്നു.
ആര്ക്കും പരിക്കില്ല. മര്ത്തോമ്മ ആശുപത്രിയിലെ സ്റ്റാഫ് ക്വാര്ട്ടേസ് കെട്ടിടത്തിന് മുകളിലെ റൂഫിംങ് പറന്നു പോയി. പലയിടത്തും വാഹന ഗതാഗതം താറുമാറായി. അത്തിക്കയം-പെരുനാട് റോഡില് അറയ്ക്കമണ് ജംങ്ഷനു സമീപം റോഡിലേക്ക് മരം കടപുഴകി വീണു ഗതാഗതം മുടങ്ങി. ചെമ്പനോലി ക്നാനായ ചര്ച്ചിന് സമീപം റബ്ബര് മരങ്ങള് ഒടിഞ്ഞു വീണ് നിരവധി വൈദ്യുതി തൂണുകള് തകര്ന്നു.
