റാന്നി: ഇട്ടിയപ്പാറ സ്വകാര്യ ബസ് സ്റ്റാന്ഡിലെ ഇരുളകറ്റാന് വേണ്ടി പൊക്കവിളക്ക് സ്ഥാപിച്ചത് കെട്ടിടങ്ങളോടു ചേര്ന്നെന്ന് ആക്ഷേപം. സ്റ്റാന്ഡില് സന്ധ്യ കഴിഞ്ഞാല് പിന്നെ ഇരുട്ടാണ്. സ്ഥാപനങ്ങളിലെ വെളിച്ചവും ബസുകള് വരുമ്പോഴുള്ള വെളിച്ചവുമാണ് യാത്രക്കാര്ക്ക് ആശ്വാസം. പൊക്കവിളക്ക് സ്ഥാപിച്ചിരുന്നെങ്കിലും സ്ഥിരം കത്താറില്ല. പരാതി ഏറുമ്പോള് അധികൃതരെത്തി പുനരുദ്ധരിക്കും. രണ്ടു ദിവസത്തിനു ശേഷം വീണ്ടും പഴയതു പോലെയാകും. ഇതിനു പരിഹാരമായിട്ടാണ് പുതിയ വെളിച്ച സംവിധാനം എത്തിച്ചത്. അത് കെട്ടിടത്തോടു ചേര്ന്നാണ് സ്ഥാപിച്ചത്. അതു കൊണ്ടു തന്നെ ഒരു വശത്തെ വെളിച്ചം മാത്രമെ യാത്രക്കാര്ക്ക് പ്രയോജനമാകു. മറു വശത്തെ വെളിച്ചം കെട്ടിടങ്ങളിലേക്കാവും പതിക്കുക. ഇത് സ്റ്റാന്ഡിന് മധ്യത്തിലേക്കോ മറ്റേതെങ്കിലും ഭാഗത്തേക്കോ നീക്കി സ്ഥാപിച്ചിരുന്നെങ്കില് എല്ലാവര്ക്കും പ്രയോജനം ചെയ്യുമായിരുന്നുവെന്ന് നാട്ടുകാര് അഭിപ്രായപ്പെട്ടു.
