ന്യൂജഴ്സി: ഹിന്ദുസ്ഥാനി സംഗീതത്തിന്റെ കുലപതി പണ്ഡിറ്റ് ജസ്രാജ് ഓര്മ്മയായി. 90 വയസ്സായിരുന്നു. അമേരിക്കയിലെ ന്യൂജഴ്സിയിലായിരുന്നു അദ്ദേഹത്തിന്റെ അന്ത്യം. കോടിക്കണക്കിന് ആരാധകരുള്ള ജസ്രംഗി ജുഗല്ബന്ദിയുടെ സൃഷ്ടാവ്. ഹരിയാനയിലെ ഹിസാറില് 1930 ജനനം. മേവതി ഘരാനയിലെ അറിയപ്പെടുന്ന സംഗീതജ്ഞനായിരുന്ന പിതാവ് മോതി രാംജി ജസ് രാജിന് നാലു വയസ്സുള്ളപ്പോള് അന്തരിച്ചു.
രത്തന് മോഹന് ശര്മ്മ, സജ്ഞയ് അഭയാങ്കര്, രമേഷ് നാരായണ്, സുമന് ഘോഷ്, തൃപ്തി മുഖര്ജി, രാധാരാമന് കീര്ത്തന തുടങ്ങി നിരവധി ശിഷ്യന്മാരുണ്ട്. അച്ഛന്റെ സ്മരണക്കായി പണ്ഡിറ്റ് മോത്തിറാം പണ്ഡിറ്റ് മണിറാം സംഗീത് സമാരോഹ് എന്ന പേരില് എല്ലാ വര്ഷവും സംഗീതാഘോഷങ്ങള് നടത്താറുണ്ട്. രാജ്യം പത്മശ്രീ, പത്മഭൂഷണ്, പത്മവിഭൂഷണ് പുരസ്കാരങ്ങള് നല്കി ജസ് രാജിനെ ആദരിച്ചിരുന്നു.
