കോന്നി : എലിയറയ്ക്കൽ ഗാന്ധിഭവൻ ദേവലോകത്തിൽ കുട്ടികൾക്കായി സംഘടിപ്പിച്ച അവധിക്കാല സമ്മർ ക്യാമ്പ് ”കരുതൽ 2026”, അമ്മയ്ക്കൊരുമ്മ പദ്ധതിയുടെ 135-ാo ദിന സംഗമം ഉദ്ഘാടനം ഗാന്ധിഭവൻ സെക്രട്ടറിയും മാനേജിങ് ട്രസ്റ്റിയുമായ പുനലൂർ സോമരാജൻ നിർവ്വഹിച്ചു. അവധിക്കാലത്ത് കുട്ടികൾക്ക് സുന്ദരമായ അറിവ് അനുഭവങ്ങൾ സമ്മാനിക്കുവാൻ, എന്നും ഓർത്തിരിക്കുവാന്, അവരിലെ മിടുക്കനെയും മിടുക്കിയെയും തട്ടിയുണർത്താൻ ഗാന്ധിഭവൻ നടത്തുന്ന ശ്രമമാണ് കരുതൽ 2026. ഗാന്ധിഭവൻ ദേവലോകത്തിലെ മുതിർന്ന അമ്മയുടെ കൈത്തലം “മുത്തിയാണ്” അമ്മയ്ക്കൊരുമ്മ പദ്ധതിയുടെ ഉദ്ഘാടനം നിർവഹിച്ചത്.
മാതാപിതാക്കളെ വീടുകളിൽ തന്നെ സംരക്ഷിക്കണം, സ്വന്തം ഭവനങ്ങളില് മാതാപിതാക്കള്ക്ക് ആദരവും സ്നേഹവും ലഭിക്കണമെന്ന സന്ദേശം വിദ്യാർത്ഥികളിലേക്കും യുവജനങ്ങളിലേക്കും സമൂഹത്തിലേക്കും പകർന്നുനൽകുന്നതിന്റെ ഭാഗമായി പത്തനാപുരം ഗാന്ധിഭവന്റ നേതൃത്വത്തിൽ ആരംഭിച്ച ഒരു വര്ഷം നീണ്ടുനില്ക്കുന്ന പദ്ധതിയാണ് അമ്മയ്ക്കൊരുമ്മ. കോന്നി ഗ്രാമപഞ്ചായത്ത് പ്രസിഡന്റ് റോജി എബ്രഹാം അധ്യക്ഷത വഹിച്ചു. ചടങ്ങിൽ ഗാന്ധിഭവൻ രക്ഷാധികാരി സി.എസ്. മോഹൻ മുഖ്യാതിഥിയായിരുന്നു. ഗാന്ധിഭവൻ സി.ഇ.ഒ ഡോ.വിൻസെന്റ് ഡാനിയേൽ, ജില്ലാ പഞ്ചായത്ത് മെമ്പർ എസ്. സന്തോഷ് കുമാർ, വാർഡ് മെമ്പർ പ്രവീൺ പ്ലാവിളയിൽ, പ്രശസ്ത ചിത്രകാരൻ കളഭകേസരി, ചിത്രകാരി ഗ്രേസി ഫിലിപ്പ്, ചിത്രകാരൻ രാജേഷ് കുമാർ, ഗാന്ധിഭവൻ ദേവലോകം ഡയറക്ടർ എസ്. അജീഷ്, വികസന സമിതി വർക്കിംഗ് ചെയർമാൻ ജി. മോഹൻദാസ് എന്നിവർ സംസാരിച്ചു.
