കണ്ണൂര് : ഹോട്ടലിലെ ഭക്ഷണ സാമഗ്രികള് ശുചിമുറിയില് സൂക്ഷിച്ചത് ചോദ്യം ചെയ്ത ഡോക്ടര്ക്ക് മര്ദനം. കണ്ണൂര് പിലാത്തറയിലെ കെസി ഹോട്ടലിലാണ് സംഭവം. കാസര്ഗോഡ് ബന്തടുക്ക പിഎച്ച്എസ്സിയിലെ ഡോക്ടര് സുബ്ബറായിക്കാണ് മര്ദനമേറ്റത്. ഞായറാഴ്ചയാണ് സംഭവം. ഡോക്ടറും സംഘവും വിനോദയാത്രയ്ക്കായാണ് കണ്ണൂരിലെത്തിയത്. ഹോട്ടലിലെത്തിയ ഡോക്ടര് ശുചിമുറിയില് ഭക്ഷണസാധനങ്ങള് കൂട്ടിയിട്ടിരിക്കുന്നത് കണ്ടു. ഇത് മൊബൈല് ഫോണില് പകര്ത്തി. ഇതിനിടെ ഹോട്ടലിലെ സെക്യൂരിറ്റി ജീവനക്കാരനെത്തി മൊബൈല് പിടിച്ചു വാങ്ങി. ഡോക്ടറെ മര്ദ്ദിക്കുകയും ചെയ്തു. ഫോണ് ഡോക്ടര്ക്ക് തിരികെ നല്കിയിട്ടില്ല. മര്ദ്ദനമേറ്റ ഡോക്ടറും സംഘവും പരിയാരം പോലീസ് സ്റ്റേഷനിലെത്തി പരാതി നല്കുകയായിരുന്നു. തുടര്ന്ന് ഹോട്ടല് ഉടമയായ കെ.സി മുഹമ്മദ് ഉള്പ്പെടെ മൂന്നുപേരെ പോലീസ് അറസ്റ്റ് ചെയ്തു. ഇവരെ റിമാന്ഡ് ചെയ്തു.
