ന്യൂഡല്ഹി : തഹസില്ദാര് ഓഫീസില് വച്ച് രാഹുല് ഭട്ട് എന്ന കശ്മീരി പണ്ഡിറ്റ് യുവാവിനെ തീവ്രവാദികള് കൊലപ്പെടുത്തിയതിനെക്കുറിച്ച് സംസാരിക്കാത്തതിന് കേന്ദ്രസര്ക്കാരിനെ വിമര്ശിച്ച് കോണ്ഗ്രസ് നേതാവ് രാഹുല് ഗാന്ധി. കശ്മീരി പണ്ഡിറ്റുകളുടെ വംശഹത്യയെക്കുറിച്ച് സംസാരിക്കുന്നതിനേക്കാള് കേന്ദ്ര സര്ക്കാരിനിഷ്ടം, അവരെ കുറിച്ചെടുത്ത സിനിമയെ കുറിച്ച് സംസാരിക്കാനാണെന്ന് കോണ്ഗ്രസ് നേതാവ് വിമര്ശിച്ചു.’കശ്മീരി പണ്ഡിറ്റുകളുടെ വംശഹത്യയെക്കാള് പ്രധാനമന്ത്രി പ്രാധാന്യം കൊടുക്കുന്നത് ഒരു സിനിമയെക്കുറിച്ച് സംസാരിക്കുക എന്നതിനാണ്. ബി.ജെ.പിയുടെ നയങ്ങള് കാരണം കശ്മീരില് ഇന്ന് ഭീകരത അതിന്റെ ഉച്ചസ്ഥായിയിലാണ്. പ്രധാനമന്ത്രി, സുരക്ഷയുടെ ഉത്തരവാദിത്തം ഏറ്റെടുത്ത് സമാധാനം സ്ഥാപിക്കാന് ശ്രമിക്കുക’, രാഹുല് ഗാന്ധി ട്വീറ്റ് ചെയ്തു.
2010-11ല് കുടിയേറ്റക്കാര്ക്കുള്ള പ്രത്യേക തൊഴില് പാക്കേജിന് കീഴില് ക്ലര്ക്ക് ജോലി ലഭിച്ച രാഹുല് ഭട്ടിനെ വ്യാഴാഴ്ച സെന്ട്രല് കശ്മീരിലെ ബുദ്ഗാം ജില്ലയിലെ ചദൂര ടൗണിലെ തഹസില്ദാര് ഓഫീസിനുള്ളില് വച്ച് ഭീകരര് വെടിവെച്ച് കൊലപ്പെടുത്തിയിരുന്നു. ഈ സംഭവത്തില് പ്രതികരിക്കുകയായിരുന്നു രാഹുല് ഗാന്ധി. രാഹുല് ഭട്ടിന്റെ കൊലപാതകത്തില് പ്രതിഷേധിച്ച നാട്ടുകാരെ പിരിച്ചുവിടാന് പോലീസ് കണ്ണീര് വാതകം പ്രയോഗിച്ചതും വാര്ത്തയായി. പ്രതിഷേധത്തെ തുടര്ന്ന് ജെ-കെ സര്ക്കാര് കൊലപാതകം അന്വേഷിക്കാന് എസ്ഐടി രൂപീകരിച്ചു.