തൊടുപുഴ : ഉടമ പുറത്തുപോയ സമയം വീട് പൂര്ണമായി കത്തിനശിച്ചു. കോലാനി പാറക്കടവ് മമ്പിള്ളില് എം.എസ്.രാജന്റെ വീടാണ് കത്തിനശിച്ചത്. 15 ലക്ഷം രൂപയുടെ നഷ്ടമുണ്ടായതായാണ് കണക്കാക്കുന്നത്.ബുധനാഴ്ച വൈകീട്ടാണ് സംഭവം. രാജന് പുറത്തുപോയിരുന്നതിനാല് അപകടം ഒഴിവായി. മിന്നലിന്റെ ആഘാതത്തിലാകാം വീടിന് തീപിടിച്ചതെന്നാണ് കരുതുന്നത്. രാജന്റെ ഭാര്യ മകന്റെ വീട്ടിലായിരുന്നു. വീട്ടിനുള്ളില്നിന്ന് തീ മുകളിലേക്ക് പടരുന്നത് കണ്ട അയല്വാസികളാണ് രാജനെ വിവരം അറിയിച്ചത്.
തൊടുപുഴയില് നിന്ന് അസി. സ്റ്റേഷന് ഓഫീസര് ഇന് ചാര്ജ് ടി.കെ.ജയറാം, ഗ്രേഡ് അസി. സ്റ്റേഷന് ഓഫീസര് കെ.എ. ജാഫര്ഖാന് എന്നിവരുടെ നേതൃത്വത്തിലെത്തിയ രണ്ട് യൂണിറ്റ് അഗ്നിരക്ഷാസേന രണ്ട് മണിക്കൂര് പരിശ്രമിച്ചാണ് തീയണക്കാന് സാധിച്ചത്. ഓടും മച്ചും തടിയുടെ ഒട്ടേറെ പണിത്തരങ്ങളുമുള്ള വീടും ഗൃഹോപകരണങ്ങളും വസ്ത്രങ്ങളും വിലപിടിപ്പുള്ള രേഖകളും പൂര്ണമായി കത്തിനശിച്ചു. വില്ലേജ് അധികൃതരും തൊടുപുഴ പോലീസും സ്ഥലം സന്ദര്ശിച്ചു.
