പെരുമ്പാവൂർ : സാധനങ്ങൾ വാങ്ങാനെന്ന വ്യാജേന കടയിലെത്തി കടയുടമയായ വീട്ടമ്മയുടെ മാല പൊട്ടിച്ച് കടന്നയാളെ പോലീസ് അറസ്റ്റ് ചെയ്തു. മാറംപിള്ളി പള്ളിപ്രം കാട്ടിലം തുരുത്തിൽ വീട്ടിൽ അജ്മൽ നഹാസ് (22)നെയാണ് പെരുമ്പാവൂർ പോലീസ് അറസ്റ്റ് ചെയ്തത്. കഴിഞ്ഞ ദിവസം വൈകിട്ട് ചേലമാറ്റത്തുള്ള കടയിലെത്തിയ ഇയാൾ സിഗരറ്റ് ആവശ്യപ്പെട്ടു.
അത് എടുക്കാൻ തിരിയുന്നതിനിടയിൽ കടയുടമയുടെ കഴുത്തിൽ നിന്ന് മാല പൊട്ടിച്ച് ബൈക്കിൽ കടന്നുകളയുകയായിരുന്നു. ഇയാൾക്കെതിരെ വിവിധ സ്റ്റേഷനുകളിൽ കേസുകളുണ്ട്. മോഷ്ടിക്കുന്ന സ്ഥലം നേരത്തെ കണ്ടു വെച്ച് മോഷണം നടത്തുന്നതാണ് ഇയാളുടെ രീതി. ബൈക്കിന്റെ നമ്പർ പ്ലേറ്റ് ഇടയ്ക്ക് മാറ്റിക്കൊണ്ടുമിരിക്കും. അജ്മൽ നഹാസിനെതിരെ കാപ്പ ചുമത്തുന്നതുൾപടെയുള്ള നിയമനടപടി സ്വീകരിക്കുമെന്ന് ജില്ലാ പോലീസ് മേധാവി കെ. കാർത്തിക് പറഞ്ഞു.
