ദില്ലി: ഗുണ്ടാ-രാഷ്ട്രീയ നേതാവ് അതിഖ് അഹമ്മദിന്റെയും സഹോദരന് അഷ്റഫ് അഹമ്മദിന്റെയും കൊലപാതകത്തില് വിശദ സത്യവാങ്മൂലം നല്കാന് യുപി സര്ക്കാരിനോട് ആവശ്യപ്പെട്ട് സുപ്രീം കോടതി. അതിഖ് അഹമ്മദിനെ ആശുപത്രിയില് കൊണ്ടുവരുന്നകാര്യം പ്രതികള് എങ്ങനെ അറിഞ്ഞെന്ന് കോടതി ചോദിച്ചു. ആംബുലന്സില് കൊണ്ടു പോകാതെ പരിശോധനയ്ക്ക് നടത്തി കൊണ്ടുപോയതെന്തെന്നും കോടതി ആരാഞ്ഞു. ഏപ്രില് 15ന് വൈദ്യപരിശോധനയ്ക്കായി പ്രയാഗ്രാജിലെ ആശുപത്രിയിലേക്ക് കൊണ്ടുപോകുന്നതിനിടെയാണ് ഇരുവരും കൊല്ലപ്പെട്ടത്.
അതിഖിനെയും സഹോദരനെയും ആംബുലന്സില് കയറ്റാതെ ആശുപത്രി പ്രവേശന കവാടം വരെ നടക്കാന് പോലീസ് പ്രേരിപ്പിച്ചത് എന്തിനാണെന്നും കോടതി ചോദിച്ചു. അതിഖ് അഹമ്മദിന്റെ കൊലപാതകത്തില് സ്വതന്ത്ര അന്വേഷണം പ്രഖ്യാപിക്കണമെന്ന് ആവശ്യപ്പെട്ട ഹര്ജി പരിഗണിക്കുമ്പോഴാണ് യു പി സര്ക്കാരിനോട് കോടതി സത്യവാങ്മൂലം സമര്പ്പിക്കാന് ആവശ്യപ്പെട്ടത്. കൊലപാതവുമായി ബന്ധപ്പെട്ട് ഇതുവരെ സ്വീകരിച്ച നടപടികള് വിശദീകരിക്കാനും കോടതി നിര്ദേശിച്ചിട്ടുണ്ട്.
